Mınıstr 1 maýsymnan bastap medbıkeler qansha jalaqy alatynyn aıtty

NUR-SULTAN. QazAqparat - 1 maýsymnan bastap 225 myń medıtsına qyzmetkeriniń jalaqysy kóteriledi. Bul týraly búgin Úkimet úıindegi baspasóz máslıhatynda QR Densaýlyq saqtaý mınıstri Eljan Birtanov aıtty, dep habarlaıdy QazAqparat tilshisi.

«Bıýdjet salasynyń tómen jalaqy alatyn barlyq qyzmetkerleriniń aılyǵy kóteriledi. Densaýlyq saqtaý júıesinde olar: medbıkeler, ózge de tómen jalaqy alatyn qyzmetkerler, sanıtarlar, birinshi kezekte jumysshylar jáne basqalar. Eńbek ótili eskerilgende olarǵa qansha jalaqy aýdarylatyn kóremiz jáne oǵan 30 paıyzdyq ústemeaqy qosylady», - dedi ol.

Osy oraıda mınıstr naqty mysal da keltirip ótti.

«Máselen, eger sanıtar 50 myń teńge alatyn bolsa, jalaqysy kóterilgennen keıin qolyna shamamen 65 myń teńge túsedi. Eger medbıkeniń ortasha jalaqysy shamamen 75 myń teńge bolsa, onda ol shamamen 99-100 myń teńge alady. Buǵan qosa, aqyly qyzmetter kórsetý múmkindigi shektelgen salalardaǵy medıtsına qyzmetkerlerin yntalandyrý úshin bul sanattaǵy dárigerlerdiń de jalaqysyn kóteremiz. Olar: emhana, jedel járdem, ana men bala, týberkýlez, onkologııa dárigerleri», - dedi E.Birtanov.

Jalpy onyń dereginshe, 1 maýsymnan bastap medıtsına salasynda jumys isteıtin 225 myń adamnyń jalaqysy 30 paıyzǵa artatyn bolady.