Mınımaldy rezervtik talaptar mehanızmi kórshiles elderde qalaı qoldanylady

ASTANA. KAZINFORM — QR Ulttyq banki taldaýshylary Qazaqstan men aımaqtaǵy elderde mınımaldy rezervtik talaptardy qoldaný tıimdiligin zerdeledi.

Qazaqstan Respýblıkasynyń Ulttyq banki (budan ári — QUB) «Aqsha-kredıt saıasatynyń quraly túrindegi mınımaldy rezevtik talaptar: halyqaralyq tájirıbe men qoldaný erekshelikteri» taqyrybynda analıtıkalyq jazba men prezentatsııa jarııalady.

QUB ózgermeli jaǵdaılarda aqsha-kredıt saıasatynyń quraldaryn jetildirý úshin onyń tıimdiligin arttyrý baǵytynda jumys júrgizip keledi. Álemdik tájirıbede mınımaldy rezervtik talaptar (MRT) mehanızmi buryn saqtandyrý quraly túrinde jáne aqsha usynysyna yqpal etý tásili retinde qoldanyldy. Búgingi tájirıbede MRT ótimdilik pen aqsha naryǵynyń qysqamerzimdik mólsherlemelerin basqarý úshin paıdalanylady.

— MRT quraly kórshiles elderde qalaı qoldanylatynyn zerdeleý úshin QUB taldaýshylary aımaqtaǵy — Armenııa, Belarýs, Qyrǵyzstan, Reseı jáne Ózbekstan ortalyq bankteriniń tájirıbesin zerttedi. Sonyń nátıjesine sáıkes, atalǵan elderde (Qazaqstandy esepke almaǵanda) ulttyq valıýtadaǵy mindettemeler boıynsha ortasha MRT normatıvi 4-4,5%, al shetel valıýtasyndaǵy mindettemeler boıynsha shamamen 15% deńgeıinde. Qazaqstanda MRT normatıvteri aıtarlyqtaı tómen (2%, 0%, 1%, 3%), bul ótimdiliktiń qurylymdyq profıtsıti jaǵdaıynda olardyń tıimdiligin aıtarlyqtaı shekteıdi, — delingen bank taratqan aqparatta.

Taldaý nátıjeleri ortalyq bankterdiń sarapshylarymen ótken kezdesýde talqylandy. Aımaqtaǵy elderde MRT qoldanýdyń salystyrmaly taldaýy men qorytyndylary, sondaı-aq Qazaqstanda paıdalaný perspektıvalary analıtıkalyq jazbada jáne prezentatsııada qamtylǵan.

Ol materıaldarmen QUB ınternet-resýrsynda tanysýǵa bolady.

Osyǵan deıin Ulttyq bank eski úlgidegi AQSh dollarlaryn satyp alýǵa qatysty málimdeme jasady.