Myńǵa jýyq turǵyny bar aýylda sport kesheni ashyldy - BQO
ORAL. KAZINFORM – Ulystyń uly kúni qarsańynda Tasqala aýdanyna qarasty Mereı aýylynda sport kesheni ashyldy. Byltyr maýsym aıynda qurylysy bastalǵan nysan 100 orynǵa shaqtalǵan.
200 mıllıon teńgeden astam qarajatqa turǵyzylǵan ǵımaratta kópbeıindi sportzal, bı zaly, jýynatyn oryn bar. Myńǵa jýyq turǵyny bar Mereı aýyly úshin mundaı nysannyń turǵyzylýy úlken jetistikke balanyp otyr. Endi aýyl jastary bos ýaqytyn tıimdi ótkizip, alańsyz sportpen shuǵyldana alady. Sondaı-aq osy kezge deıin eski ǵımaratty panalap kelgen aýyl mádenıet úıiniń ujymy jańa ǵımaratqa ornalasyp úlgergen.
Jalpy atalǵan oblysqa qarasty 12 aýdan bolsa, 10 aýdan ortalyǵy jańa zaman talabyna saı keletin sport keshenimen qamtyldy. Kóp uzamaı Kaztalov jáne Tasqala aýyldarynda zamanaýı saýyqtyrý kesheni boı kóteredi. Sonymen qatar ár aýdannyń iri aýyldyq okrýgine sport keshenin turǵyzý jospary da birtindep oryndalýda. Aqjaıyq aýdanynyń Taıpaq aýylynda byltyr jańa sport nysany salynǵan. Báıterek aýdanyna qarasty Darııan, Terekti aýdanyna qarasty Úlken Eńbek aýyldaryna jańa mádenı-saýyqtyrý keshinin turǵyzý josparlanyp otyr. Memleket basshysynyń Joldaýynda aıtylǵan «100 dene shynyqtyrý-saýyqtyrý kesheni» jobasyn iske asyrýǵa bul óńir ózindik úlesin qosyp keledi.
Aýylǵa erekshe sán berip, áz-Naýryz meıramy aldynda eldi qýanyshqa, jastardy shattyqta bólegen mádenı-saýyqtyrý kesheniniń saltanatty ashylýyna BQO ákiminiń orynbasary Baqytjan Narymbetov qatysty.
– Salamatty ómir saltyn qalyptastyryp, eldiń sportqa bet burýyna el úkimeti erekshe kóńil bóledi. Ásirese, aýyldaǵy aǵaıynnyń, ómirin aýylmen baılanystyrǵan jastardyń sportpen alańsyz shuǵyldanýyna jaǵdaı jasaýǵa qashan da nıettimiz. Búgin Mereı aýylynyń qýanyshyna kýá boldyq. Jyl basy áz-Naýryz qarsańynda osyndaı tamasha jaǵdaı bolyp tur. Jańa mádenı-sport kesheni Mereıdiń ǵana emes, qazaq eliniń mereıin asyrar azamatta shyǵar oryn bolsyn, - dedi Baqytjan Narymbetov.
Odan soń aýdan ákimi Talǵat Shákirov sóz alyp, aýyl turǵyndary atynan keshendi turǵyzǵan merdiger kompanııa basshysy Qaınar Tilekqalıulyna alǵys bildirdi.
- Osydan 5-6 jyl buryn barlyq aýylda osyndaı sport ǵımaraty boı kóteredi degen sózge sený múmkin emes edi. Búgin keshenniń ashylýy sátiniń kýási boldyq. Bul elge, aýyldaǵy aǵaıynǵa kórsetilgen qamqorlyq. Elimiz aman bolsyn, - dedi aýyl turǵyndary atynan sóz alǵan aqsaqal Sabyr Janaev.
Saltanatty ashylýdan soń ulttyq sport túrlerinen ótetin aýdandyq spartakıadanyń alaýy tutandy.
