Myńǵa jýyq áskerı sý tasqyny saldaryn joıý jumystaryna jumyldyryldy
ASTANA. KAZINFORM – Bir apta ishinde sý basqan aımaqtarda áskerı ushqyshtar sý basqan aımaqtardan eki myńǵa jýyq adamdy qaýipsiz jerge kóshirdi.
«Sý tasqynynyń saldaryn joıýǵa 27 naýryz ben 2 sáýir aralyǵynda barlyǵy 964 áskerı qyzmetshi, 55 avtokólik tehnıkasy, 14 tikushaq jáne 2 áskerı-kólik avıatsııasy ushaǵy jumyldyryldy. Qarýly kúshterdiń bortymen 1 979 adam evakýatsııalandy, onyń 584-i bala. Tikushaqtar 230 márte ushyp, 40 000 kelige jýyq gýmanıtarlyq júk tasymaldady. 19 700-den astam qum salynǵan qap daıyndalyp, tóseldi. Sý tasqynyna qarsy is-sharalar áli de jalǵasady», - delingen Qorǵanys mınıstrliginiń Kazinform agenttigine bergen jaýabynda.
Tek ótken táýlikte sý tasqynyna qarsy is-sharalarǵa 361 áskerı qyzmetshi, 15 avtokólik, 5 tikushaq jáne áskerı-kóliktik avıatsııa ushaǵy jumyldyryldy.
Aqtóbe oblysynyń eldi mekenderinen Áýe qorǵanysy kúshteri men áskerı ushqyshtar daıyndaıtyn ınstıtýttyń tikushaqtarymen 128 adam, onyń ishinde 27 bala evakýatsııalandy. Aımaqtarǵa shamamen 10 000 keli júk jetkizildi. 29 adam tasymaldandy. Olardyń ishinde TJM, ákimdik, buqaralyq aqparat quraldary jáne Áýe qorǵanysy kúshteri áskerı ınstıtýtynyń ınjenerlik-tehnıkalyq quramynyń ókilderi bar.
Abaı oblysynda Semeı qalasy avıabazasynyń ushqyshtary TJM qyzmetine aýdannyń ústinen aınalyp qarap shyǵýyna kómektesti.
«Qaraǵandy oblysy Nura aýdany Nura, Myńbaev, Egindi jáne Kóbeteı aýyldarynda da sý tasqynyna qarsy is-sharalar jalǵasty. Ol jerge 122 áskerı qyzmetshi jáne 7 avtokólik tartyldy. 1400-den astam qap qum daıyndalyp, tóseldi. Aǵyn sý arnalary qardan tazartyldy jáne eki jer úıdiń aınalasynan sý shyǵaryldy. Eldi mekenderdiń aınalasynda jáne Nura ózeniniń boıynda úıindi jasaldy», - delingen mınıstrlik aqparatynda.
Sonymen qatar, Aqtóbe oblysy Muǵaljar aýdanynda «Batys» óńirlik qolbasshylyǵy 30238 áskerı bóliminiń áskerı qyzmetshileri 700 qap qum daıyndap, olardy tóseý jumystaryn júrgizdi. Batys Qazaqstan oblysynyń aýmaqtyq qorǵanys brıgadasy qum salynǵan qaptardy daıyndaýǵa jáne jergilikti turǵyndardy sý basqan úılerden alyp shyǵýǵa tartyldy. «Batys» óńirlik qolbasshylyǵy 41443 áskerı bóliminiń jeke quramy Atyraý oblysy Jylyoı aýdany Aqkıiztoǵaı aýylyndaǵy bógetti kúsheıtý jumystaryn júrgizdi.
Áýe qorǵanysy kúshteri áskerı ınstıtýtynyń qyzmetshileri Aqtóbe oblysynyń Kırpıchnyı, Aqjar, Aqshat eldi mekenderinde patrýldeýdi júzege asyrdy.
