Myńǵa jýyq apatty lıfti bar: jańartý jumystaryna kimder jaýapty
ASTANA.KAZINFORM — El aýmaǵyndaǵy lıftilerdi aýystyrý jáne jóndeýdiń jol kartasy bekitildi. Bul týraly Ónerkásip jáne qurylys mınıstrligi málim etti.
Atap aıtqanda, jergilikti atqarýshy organdar eldi mekenderdiń áleýmettik ınfraqurylym obektilerinde (turǵyn úıler, bilim berý jáne medıtsınalyq mekemeler, saýda ortalyqtary jáne t. b.) lıft sharýashylyǵyn qaýipsiz paıdalaný talaptarynyń saqtalýyna memlekettik baqylaý men qadaǵalaýdy júzege asyrady.
— Oblystardyń jáne Astana, Almaty jáne Shymkent qalalarynyń ákimdikteri avarııalyq jaǵdaıdaǵy jáne 25 jyldan astam ýaqyt paıdalanylyp kele jatqan lıftilerdi aýystyrý ári kúrdeli jóndeý boıynsha merzimderi men qarjylandyrý kózderi kórsetilgen jol kartalaryn bekitti. Búginde ákimdikterdiń aqparatyna sáıkes, turǵyn úı qorynda 37 918 lıft bar. Onyń ishinde 25 jyldan astam ýaqyt paıdalanylyp kele jatqan 3 797 lıft tirkeldi, al tehnıkalyq qyzmet kórsetý aıasynda 1 924 lıft kúrdeli jóndeýdi qajet etedi, sondaı-aq 922 lıft apatty jaǵdaıda. Jergilikti bıýdjet qarajaty esebinen 2019 jyldan bastap 2 742 lıft aýystyryldy, — delingen mınıstrliktiń Kazinform agenttigine bergen jaýabynda.
Sonymen qatar, turǵyn úı zańnamasynyń normalaryna sáıkes, kondomınıým obektisiniń ortaq múlkin, onyń ishinde lıftilerdi aýystyrý nemese kúrdeli jóndeý páterler men turǵyn emes úı-jaılar menshik ıeleriniń kópshilik daýsymen qabyldanǵan hattamalyq sheshim negizinde júrgiziledi.
Osyǵan baılanysty, turǵyn úı qorynyń jaı-kúıin tıisti deńgeıde ustaý maqsatynda, kondomınıým obektisiniń ortaq múlkine kúrdeli jóndeý júrgizý qaǵıdalaryna (Indýstrııa jáne ınfraqurylymdyq damý mınıstriniń 2020 jylǵy 29 sáýirdegi № 246 buıryǵy) sáıkes, óńirlerge respýblıkalyq bıýdjet qarajaty esebinen ortaq múlikke, onyń ishinde lıft jabdyqtaryn jóndeýge jáne aýystyrýǵa 7 jyl merzimge 1% mólsherlememen bıýdjettik kredıt beriledi. Bul qarajat kondomınıým obektisi menshik ıelerinen 7 jyldan 15 jylǵa deıingi merzimde qaıtarymdy negizde óteledi.
Buǵan deıin habarlanǵandaı, jyl basynda paıdalanylǵanyna 25 jyldan asqan lıftilerdi aýystyrý jáne jóndeý jol kartasy ázirlenetinin jazǵan edik.
