Mıneraldy sýymen aty shyqqan Saryaǵashta týrızmdi damytý kózdelip otyr

SARYAǴASh. QazAqparat - Mıneraldy shıpaly sýymen áıgili Saryaǵash shıpajaılary aýdannyń áleýmettik-ekonomıkalyq damý kórsetkishin joǵarylata túspek, dep habarlaıdy QazAqparat obyls ákiminiń baspasóz qyzmetine silteme jasap.

Byltyr mıneraldy sýdan shıpa izdep kelgen týrıster sany 123 myńnan asqan bolsa, bıyl olardyń sany 15%-ǵa artady dep kútilýde. Osy maqsatta naqty josparlar bekitilgen.

Bul máseleler Túrkistan oblysynyń ákimi Ómirzaq Shókeevtiń Saryaǵash aýdany ákiminiń jyldyq jumys qorytyndysyn tyńdaý barysynda baıandaldy.

Búginde aýdanda 40-qa jýyq saýyqtyrý shıpajaıy, balalar shıpajaılary, golf klýbtar men 20-dan astam qonaq úı qyzmet kórsetedi. Aýdan basshysy Muhıt Otarshıev týrızmdi damytý barynsha júzege asyrylatynyn aıtty.

Saryaǵash aýdany ekonomıkasynyń negizgi tiregi - aýyl sharýashylyǵy salasy da qarqyndy damyp keledi. Byltyr jalpy ónim kólemi 77 mlrd teńgeden asqan. Aldaǵy ýaqytta egistik alqaby 65 myń gektarǵa ulǵaıtylyp, jylyjaı sharýashylyǵy men tamshylatyp sýarý ádisin qosymsha 400 gektar jerge jańadan engizý jumystary júrgizilmek. Ásirese jemis-jıdek ónimderin ósirýdi keńeıtý kózdelýde. Esepten keıin aýdandaǵy birqatar qıyndyqtardy kótergen oblys basshysy olardy sheshý joldaryn shuǵyl qarastyrýdy mindettedi.

«Qurǵaq sóz aıtatyn ýaqyt ketti. Naqty jáne nátıjeli jumys bolsyn. Júktelgen tapsyrmalar mindetti túrde oryndalýy tıis. Atqarylatyn barlyq jumystardy qadaǵalaıtyn bolamyn», - dedi aýdan ákiminiń esebin tyńdaǵan aımaq basshysy Ómirzaq Estaıuly.

Sondaı-aq oblys ákimi Saryaǵash aýdanynyń turǵyndaryn qabyldap, ótinishterin tyńdady. Aýdan aqsaqaldary aýyz sý men sýarmaly sýmen qamtamasyz etý, halyq sanynyń ósýine baılanysty mektep salý sekildi máseleler kóterdi. Aımaq basshysy olarǵa qatysty jaýapty sala jetekshilerine naqty tapsyrmalar berdi.