«Mıneraldyq resýrstarǵa qyzyǵýshylyq artty»: AQSh Ortalyq Azııaǵa nazaryn kúsheıtti
ASTANA. KAZINFORM — Búgin Astana tórinde halyqaralyq taý-ken metallýrgııa kongresi ótip jatyr.
Jıynda sóz alǵan AQSh Saýda mınıstriniń orynbasary, AQSh jáne sheteldegi kommertsııalyq qyzmettiń bas dırektory Devıd Fogel Vashıngtonnyń Ortalyq Azııa elderimen, sonyń ishinde Qazaqstanmen ekonomıkalyq yntymaqtastyqty odan ári keńeıtip, mıneraldyq resýrstar sektory men óndiristik tizbekterdi damytýǵa basa nazar aýdaryp otyrǵanyn jetkizdi.
Onyń aıtýynsha, AQSh bul baǵytty jahandyq jetkizý júıelerin qaıta qalyptastyrýdaǵy strategııalyq faktor retinde qarastyrady.
— Biz Ortalyq Azııamen, ásirese Qazaqstanmen uzaqmerzimdi strategııalyq seriktestik ornatýǵa múddelimiz. Bul tek resýrstardy ıgerý nemese jetkizý tizbekteri týraly emes, bul — tolyq ekojúıe qalyptastyrý týraly másele, — dedi ol.
Fogeldiń sózinshe, Qazaqstan AQSh úshin mańyzdy seriktes retinde qarastyrylady, sebebi eldiń resýrstyq áleýeti joǵary ári halyqaralyq yntymaqtastyqqa ashyq.
— Qazaqstan biz úshin óte mańyzdy seriktes, óıtkeni munda resýrstyq áleýet óte joǵary jáne yntymaqtastyqqa ashyqtyq bar. Biz tek shıkizat óndirýmen shektelmeımiz — maqsatymyz óndiristiń barlyq tizbegin damytý: barlaý, óndirý, óńdeý, — dedi ol.
Onyń aıtýynsha, AQSh-tyń bul ustanymy Ortalyq Azııanyń jahandyq ónerkásip úshin mańyzy bar mıneraldar naryǵyndaǵy róliniń artýymen tikeleı baılanysty bolyp otyr. Vashıngtonnyń jańa ekonomıkalyq baǵyty óńirde ınvestıtsııalar men tehnologııalyq áriptestikti kúsheıtýge jol ashýy múmkin.
Budan bólek Qazaqstan Saýd Arabııasymen de taý-ken metallýrgııa sektoryndaǵy áriptestikti kúsheıtýdi qolǵa aldy.
Aıta keteıik, búgin elordada taý-ken metallýrgııa salasyndaǵy eń iri halyqaralyq alańdardyń biri — 16-Astana Mining & Metallurgy (AMM 2026) halyqaralyq taý-ken metallýrgııa kongresi óz jumysyn bastady. Atalǵan is-sharaǵa 15 elden 69 kompanııa qatysyp jatyr. Olardyń qatarynda Aýstralııa, Germanııa, Italııa, Kanada, Qytaı, Saýd Arabııasy, AQSh, Fınlıandııa, Frantsııa, Chehııa jáne Shvetsııa sekildi memleketter bar.
Buǵan deıin aıtýly sharaǵa qatysqan Úkimet basshysy 2026-2028 jyldary geologııalyq barlaý jumystaryna memleket tarapynan shamamen 470 mln dollar ınvestıtsııa salynatynyn atap ótken edi.
