Mindetti jáne ózara saqtandyrý, salyq salý máseleleri jónindegi zań aktilerine engizilgen tolyqtyrýlar men ózgertýler aqpannyń 20-nan bastap kúshine endi
ALMATY. Aqpannyń 23-i. QazAqparat /Ádilet Musahaev/ - Zańǵa engizilgen ózgertýler nátıjesinde saqtandyrý kompanııalary saqtandyrýshylar qoǵamdastyǵyna bir qadam jaqyndaı tústi.
Bul jaıynda búgin «Kómmesk-Ómir» SK AQ men saqtandyrý ombýdsmandarynyń birlesken baspasóz máslıhatynda aıtyldy, dep habarlaıdy QazAqparat.
Saqtandyrý ombýdsmany Vıtalıı Verevkınniń aıtýynsha, Qazaqstannyń saqtandyrý tájirıbesi damý ústinde, sondyqtan da ony retteý úshin tolyqqandy jetildirilgen zań aktisi kerek bolǵan. «QR-nyń mindetti jáne ózara saqtandyrý, salyq salý máseleleri jónindegi birqatar zań aktilerine tolyqtyrýlar men ózgertýler engizý týraly» Zań osy jumystyń nátıjesi bolyp tabylady. Ol aǵymdaǵy jylǵy aqpannyń 20-nan bastap kúshine endi», deıdi ol.
Eń aldymen saqtanýshy taraptyń, zardap shegýshiniń quqyqtary artyp, saqtandyrý ombýdsmanynyń ókileti kúsheıgenin aıta ketý kerek. Endi saqtandyrýshy da, zardap shegýshi de saqtandyrý ombýdsmanyna júginip, kólik ıesiniń azamattyq-quqyqtyq jaýapkershiligin saqtandyrý týraly kelisimsharttan týyndaǵan máselelerdi retteý múmkindigine ıe bolady.
«Saqtandyrý salasyn ári qaraı damytý úshin máselelerdi sheshýge qaýqary jetetin myqty normatıvtik baza azdyq etedi. Sondyqtan ózara tájirıbe almasyp, qordalanyp qalǵan máselelerdiń sheshimin tabý úshin Qazaqstandaǵy barlyq saqtandyrý kompanııalarynyń kúsh biriktirgeni durys. Qabyldanyp otyrǵan jańa zań osy baǵyttaǵy mańyzdy qadamdardyń biri dep esepteımin», deıdi «Kómmesk-Ómir» SK AQ-nyń basqarma tóraǵasy Dmıtrıı Jerebıatev.
