Mindetti jáne erikti vaktsınanyń ara jigin ajyrata almaı júrgender kóp - senator
NUR-SULTAN. QazAqparat - Qazirge deıin mindetti jáne erikti vkktsınanyń ara jigin ajyrata almaı júrgender kóp. Bul týraly QR Parlamenti Senatynyń jalpy otyrysynda senator Dana Nurjigitova aıtty, dep habarlaıdy QazAqparat tilshisi.
«Birinshiden, Kodeks aýrýdyń aldyn alý emes onyń saldarymen kúreske kóbirek baǵyttalǵan tárizdi. Muny aıtýyma sebep - azamattardy salaýatty ómir saltyn ustanýǵa yntalandyratyn baptardyń azdyǵy. Mysaly, ýaqytyly dárigerge qaralyp, densaýlyǵyn kútetin azamattarǵa Mindetti áleýmettik saqtandyrý júıesi aıasynda yntalandyrý bonýstaryn engizýge bolar edi», - dedi senator «Halyq densaýlyǵy jáne densaýlyq saqtaý júıesi týraly» kodeksin talqylaý barysynda.
Ekinshiden, Dana Nurjigitova jalpy kodeksti halyqqa túsindirý jumystary álsiz júrgizilgendikten qoǵamda ekiushty áńgimeler kóbeıgenine basa nazar aýdartty.
«Mysaly, kodekste azamattardyń emdelýge jáne basqa da medıtsınalyq aralasýlardy júrgizýge, habardar etilgen kelisim berýge nemese olardan bas tartý quqyǵy qarastyrylǵan dep jazylǵan. Al bul norma azamattarymyzdyń ekpeden bas tartý quqyǵyn qanshalyqty qamtamasyz ete alady? Qoǵamda qyzý pikirtalas týdyrǵan da kodekstiń dál osy tusy ǵoı. Qazirge deıin mindetti jáne erikti vkktsınanyń ara jigin ajyrata almaı júrgender kóp. Al bul máseleni halyqqa jetkizetin medıtsına salasynyń salmaqty sarapshylary men betke ustar medıtsına mamandary, ǵalymdar, ásirese, qazaq tildi mamandar túsindirý jumystaryna belsendi aralasyp otyrǵan joq dep olaımyn. Osy enjarlyqtyń saldarynan kópshilik mindetti vaktsınany májbúrleý dep túsinip júr. Sondyqtan menińshe, biz búgin talqylap otyrǵan kodeks jobasynda eshqandaı májbúrli túrde júrgiziletin vaktsınatsııanyń bolmaıtyndyǵy týraly túsindirý jumystaryna kóbirek kóńil bólý qajet dep esepteımin. Jalpy BAQ-ta medıtsına qyzmetkeriniń ult dárigeri dárejesindegi medıatulǵasynyń joqtyǵy osyndaıda bilindi. Qazaqstan medıtsınasynyń kelbetin qalytastyrý, dáriger mártbesin kóterý osy saladaǵy tulǵatanýdan bastalýy kerek. Bizde halyqqa sóz aıtatyn, halyq densaýlyǵyna ómirin arnaǵan, ǵylymnyń, bilimniń, aǵyrtýshylyqtyń jolynda júrgen dáriger joq degenge senbeımin», - dedi ol.
Senator úshinshiden, jaýapkershilik máselesine nazar aýdartty.
«Ata-ana ne balanyń zańdy ókili ekpeden bas tartýyna bolady. Ondaı quqyǵy bar. Al erteńgi kúni sol adamdar ózderi aýrýǵa shaldyǵyp, aınalasyndaǵylarǵa juqtyryp ne bolmasa adam ólimine ákeletin jaǵdaı týdyrsa, olardyń jaýapkershiligi qandaı? Bul máseleni bolashaqta eskerý qajet», -dedi Dana Nurjigitova.
