Mindetti vaktsınatsııa: mekemelerdi tekserý algorıtmi bekitilmegen – «Atameken»

NUR-SULTAN. QazAqparat – «Ashyq» jobasynyń adal qatysýshylaryna demalys kúnderi jumys isteýge ruqsat berý kerek. Bul týraly búgin Úkimet otyrysynda «Atameken» Ulttyq kásipkerler palatasy basqarma tóraǵasynyń birinshi orynbasary Narıman Ábilshaıyqov aıtty, dep habarlaıdy QazAqparat tilshisi.

«Ashyq» jobasynyń adal qatysýshylaryn yntalandyrý maqsatynda olarǵa demalys kúnderi jumys isteýge ruqsat etýdi suraımyz. «Qońyr-qyzyl» aımaqta bastapqyda senbi kúni saǵat 22.00-ge deıin, al «Ashyq» jobasynyń kóshbasshylaryna saǵat 24.00-ge deıin jumys isteýge ruqsat etýdi usynamyz», - dedi ol.

Sonymen qatar ol 10 tamyzdan bastap qyzmetkerlerdi mindetti túrde birinshi komponentpen egý kúshine engenin, alaıda naqty tekserý algorıtmi bekitilmegenin, monıtorıngilik toptar sýbektilerdi qalaı tekseretini de túsiniksiz ekenin basa aıtty.

«Óńirlerde oryn alǵan túrli jaǵdaılarǵa baılanysty «Ashyq» jobasy boıynsha Bas memlekettik sanıtarlyq dárigerdiń biryńǵaı qaýlysyn ornatýdy usynamyz. Buǵan deıin bul usynys eskerilgen bolatyn, biraq «qyzyl» aımaq enbeı qalyp otyr. Osy talapty «qyzyl» aımaqtaǵy óńirlerge taratýdy suraımyz. Óıtkeni, qazir óńirlerdiń basym bóligi «qyzyl» aımaqqa enip otyr», - dedi Narıman Ábilshaıyqov.