Mindetti profılaktıkalyq ekpeler júrgiziletin aýrýlardyń tizbesi bekitildi
NUR-SULTAN. QazAqparat - QR Úkimetiniń 2020 jylǵy 24 qyrkúıektegi qaýlysymen medıtsınalyq kómektiń kepildik berilgen kólemi aıasynda indetke qarsy mindetti profılaktıkalyq ekpeler júrgiziletin aýrýlardyń tizbesi, sondaı-aq ekpelerdi júrgizý qaǵıdalary, merzimderi jáne halyqtyń profılaktıkalyq ekpelerge jatatyn toptary bekitildi, dep habarlaıdy QazAqparat.
Myna ınfektsııalyq jáne parazıttik aýrýlarǵa qarsy mindetti profılaktıkalyq ekpeler (vaktsınalar men basqa da ımmýndyq bıologııalyq preparattardy salý) respýblıkalyq bıýdjet qarajaty esebinen júrgiziledi:
Josparly profılaktıkalyq ekpeler: «V» vırýsty gepatıti; b tıpti gemofıldik ınfektsııa; dıfterııa; kókjótel; qyzylsha; qyzamyq; pnevmokokk ınfektsııasy; polıomıelıt; sirespe; týberkýlez; epıdemııalyq parotıt.
Epıdemıologııalyq kórsetilimder boıynsha profılaktıkalyq ekpeler: qutyrma; ish súzegi; kóktemgi-jazǵy kene entsefalıti; oba.
Sonymen qatar, myna ınfektsııalyq aýrýlarǵa qarsy epıdemıologııalyq kórsetilimder boıynsha mindetti profılaktıkalalyq ekpeler jergilikti bıýdjetterdiń qarajaty esebinen júrgiziledi: «A» vırýsty gepatıti; tumaý; kúıdirgi; týlıaremııa.
Aıta keteıik, medıtsınalyq kómektiń kepildik berilgen kólemi aýqymynda mindetti profılaktıkalyq ekpelerdi júrgizý qaǵıdalary men merzimderi bekitildi. Osy qaýly alǵash resmı jarııalanǵan kúninen keıin kúntizbelik on kún ótken soń qoldanysqa engiziledi.
