Mindetti medıtsınalyq saqtandyrýdy engizý jarty jylǵa shegerilýi múmkin
Muny «qujatty áli de egjeı-tegjeıli pysyqtap, ári zańǵa tolyqtyrýlar men ózgertýler engizý kerek» dep túsindiredi vedmstvo mamandary. Máselen medıtsınalyq saqtandyrý sheńberinde sheteldikter qandaı kómekke júgine alady degen tarmaqtaryn jazý kerek. Budan bólek, mınıstrlik beıresmı túrde jumys isteıtinderge de qoldanatyn tetik qarastyrýdy usynyp otyr.
«Óz-ózin jumyspen qamtyǵan, biraq ol tıimsiz jandardyń jáne bireýiniń asyraýyndaǵy adamdardyń jaǵdaıy qalaı bolady degen suraqtardy talqyladyq. Qoldanystaǵy zań men atap ótken toptardy esh elemeıdi. Eger siz eki toptyń bireýine kiretin bolsańyz, joba kúshine engen kúni tek shuǵyl járdemdi ǵana ala alasyz. Osy rette biz ne istemekpiz? Sheteldik tájirıbeni biraz zerttedik. Soǵan saı árbir adam saqtandyrý qoryna eń tómengi mólsherleme boıynsha tólem jasaı alady. Osy zertteýlerimizdi halyqqa da, Parlamentke de usynamyz», deıdi QR Densaýlyq saqtaý jáne áleýmettik damý mınıstriniń orynbasary Eljan Birtanov.
Tolyqtyrýlar men ózgertýlerdi qamtyǵan qujat qazir kelisilip jatyr. Al kúzde Parlamenttiń qaraýyna usynylmaq. Mindetti medıtsınalyq saqtandyrý júıesi 2018 jyly iske qosylǵanymen, arnaıy qorǵa qarjy aýdarý keler jyldyń shildesinde bastalady. Onyń bastapqy eki paıyzyn qyzmetkerleri úshin jumys berýshi tóleıtin bolady.