Mindetti medıtsınalyq saqtandyrý qazaqstandyqtardyń densaýlyǵyn jaqsartýǵa septigin tıgizedi - Alekseı Tsoı
ASTANA. QazAqparat - Búgin Astanada QR Densaýlyq saqtaý vıtse-mınıstri Alekseı Tsoıdyń tóraǵalyǵymen QR Prezıdentiniń «Qazaqstannyń úshinshi jańǵyrýy: jahandyq básekege qabilettilik» atty halyqqa Joldaýyndaǵy mindetti áleýmettik medıtsınalyq saqtandyrý júıesin engizý máselelerine arnalǵan dóńgelek ústel ótti, dep habarlaıdy QazAqparat.
«Elbasy óziniń bıylǵy Joldaýynda densaýlyq saqtaý júıesiniń aldyna mindetti áleýmettik medıtsınalyq saqtandyrýdy engizý, densaýlyq saqtaý salasyn aqparattandyrý, dárilik zattardyń baǵasyn retteý syndy birqatar mindetter qoıdy. Sondyqtan biz keń kólemdi aqparattyq-túsindirý jumystaryn qolǵa alyp, daıyndyq jumystaryn júrgizýimiz qajet», - dedi sharany ashqan vıtse-mınıstr.
Osy rette ol mindetti áleýmettik medıtsınalyq saqtandyrý júıesin engizý kezinde densaýlyq saqtaý salasy básekelestik ortaǵa beriletindigin, bul kórsetiletin medıtsınalyq kómektiń sapasyn arttyrýdy kózdeıtindigin basa aıtty.
«Densaýlyq saqtaý salasyndaǵy standarttardy engizý, medıtsınalyq kómek kórsetýdi uıymdastyrý algorıtmderi men klınıkalyq hattamalaryn engizý, medıtsınalyq qyzmet kórsetý maqsatynda densaýlyq saqtaý salasynyń sýbektileri arasynda baıqaý ótkizý, medıtsınalyq qyzmetterdi akkredıtteý medıtsınalyq qyzmetterdiń sapasyn qamtamasyz etpek», - dedi Tsoı.
Sondaı-aq Alekseı Tsoı mindetti áleýmettik medıtsınalyq saqtandyrý júıesin engizý qazaqstandyqtardyń densaýlyǵyn jaqsartýǵa, ómir súrý uzaqtyǵyn arttyrýǵa, sapaly medıtsınalyq kómekti qoljetimdi etýge, ony halyqtyń suranysyna saı etýge, ambýlatorlyq deńgeıde dárimen qamtamasyz etýdiń aıasyn keńeıtýge, densaýlyq saqtaý júıesindegi beıresmı tólemder kólemin azaıtýǵa múmkindik beretindigin atap ótti.
«Aǵymdaǵy jylǵy 7 aqpanda mindetti áleýmettik medıtsınalyq saqtandyrýdy engizýdiń úshinshi aqparattyq-túsindirý kezeńi bastaldy. Atalǵan kezeń halyqqa, óndirister, kásiporyndar, uıymdar, sharýashylyq ujymdary men ÚEU ókilderi arasynda keńinen aqparattyq túsindirý jumystaryn júrgizýdi qarastyrady. Onyń aıasynda mindetti áleýmettik medıtsınalyq saqtandyrýdy týraly zańnamaǵa engiziletin túzetýler týraly túsiniktemeler beriledi», - dedi vıtse-mınıstr.
