Mindetti áleýmettik medsaqtandyrýǵa 78 uıym tirkeldi - Qyzylorda oblysy
Bul týraly «Áleýmettik medıtsınalyq saqtandyrý qory» KEAQ Qyzylorda oblysy boıynsha fılıalynyń bas sarapshysy Abylaıhan Rahymov jan-jaqty aıtyp berdi, dep habarlady QazAqparat tilshisi.
Bas sarapshynyń aıtýynsha, halyq densaýlyǵyn jaqsartý maqsatynda engizilip jatqan reformalardyń barlyǵy sala jumysynda óz nátıjesin berip keledi. Mindetti áleýmettik medıtsınalyq saqtandyrý júıesi arqyly «Áleýmettik medıtsınalyq saqtandyrý qory» KEAQ (ári qaraı Qor) quryldy. 2017 jyldyń maýsym aıynda osy atalǵan qordyń fılıaldary elimizdiń árbir oblystarynda resmı túrde ashyldy jáne de shilde aıynan bastap jumys berýshiler men kásipkerler jáne azamattyq quqyqtyq shart arqyly jumys atqaratyndardan aýdarymdar men jarnalar turaqty aýdarylyp otyr.
«Qazirgi tańda qordyń jumysy ІІІ kezeńmen atqarylyp jatyr.
І kezeń - tegin medıtsınalyq kómektiń kepildendirilgen kólemi (TMKKK) sheńberinde qyzmet kórsetýden úmitker densaýlyq saqtaý sýbektileriniń derekqory qalyptastyryldy. Atalǵan derekqorǵa 2018 jyly medıtsınalyq kómek kórsetetin uıym óziniń ótinimi arqyly tirkeldi. Osyǵan sáıkes qazirgi kezde Qyzylorda oblysy boıynsha 78 medıtsınalyq uıym tirkeldi, onyń 34 memlekettik negizde, al 44 jeke medıtsınalyq kómek kórsetetin uıymdar.
Al ІІ kezeń - «Turǵyndardy alǵashqy medıtsınalyq-sanıtarııalyq kómek uıymyna tirkeý» 15 qyrkúıek pen 15 qarasha aralyǵynda júrgizildi. Bul aralyqta halyq óz ótinishimen tańdaǵan emhanasyna baryp tirkele aldy. Emhanalyq negizde kómek kórsetetin derekqorda tirkelgen medıtsınalyq uıymdarda jáne turǵyndar arasynda Qor fılıalynyń mamandarymen birge túsindirme jumystary júrgizildi. Osyǵan oraı shyǵarylǵan vıdeorolıkter men habarlandyrýlardyń barlyǵy emhanalyq negizde qyzmet kórsetetin medıtsınalyq uıymdardyń ınternet resýrstary, oblystyq telearnalar, "Azamattarǵa arnalǵan úkimet" memlekettik korporatsııasy" KE AQ (halyqqa qyzmet kórsetý ortalyǵy) jáne oblystyq BAQ quraldary arqyly turǵyndarǵa jetkizildi.
Sonymen birge ІІІ kezeń boıynsha qor aǵymdaǵy jyldyń 13 qarasha men 20 qarashasy aralyǵynda Tegin medıtsınalyq kómektiń kepildik berilgen kólemi qyzmetterin berýshini tańdaý rásimin ótkizý týraly» ótinimderdi qabyldaý jóninde habarlamasy Qordyń fms.kz saıtynda jáne Qyzylorda oblystyq densaýlyq saqtaý basqarmasynyń saıtynda jarııalandy. Derekqorǵa tirkelgen 68 medıtsınalyq uıym naqtylanǵan qujattary arqyly óz ótinimderin berdi. Osy ýaqytta komıssııa músheleri Qor fılıalyna túsken ótinimderdi jeltoqsan aıynyń ortasyna deıin qaraıdy. Medıtsına uıymdaryn birneshe kórsetkish boıynsha baǵalaý josparlanyp otyr. Olardyń arasynda kadrlar quramy men materıaldyq-tehnıkalyq jabdyqtalý deńgeıi, sońǵy 3 jylda atqarǵan qyzmetine qatysty negizgi kórsetkishter, rastalǵan, negizi bar shaǵymdar bar. Qaraý nátıjesinde qandaı medıtsına uıymdarynyń tıisti deńgeıde qyzmet kórsete alatyny anyqtalady. Osy oraıda naqty aıta ketetin jaıt memlekettik medıtsınalyq uıymdarǵa da, jeke menshik aýrýhanalar men emhanalarǵa da teńdeı jaǵdaı jasalyp otyr»,-deıdi A. Rahymov.
