Mindetti áleýmettik medıtsınalyq saqtandyrýdy engizýde esh kedergi joq- Berdibek Saparbaev
«Árbir memlekettiń, ulttyń bolashaǵy birden-bir sol memlekettiń azamattarynyń bilimine, densaýlyǵyna, mádenıetine, tárbıesine baılanysty. Osy 28 jyl ishinde Qazaqstanda densaýlyq salasyna qandaı kóńil bólingenin ózderińiz kúndelikti ómirden jaqsy bilesizder. Onyń eń bir negizgi aıǵaǵy - qazirgi ýaqytta qazaqstandyqtardyń ómir súrý uzaqtyǵynyń 75 jasqa jetkeni. Bul úlken kórsetkish. 28 jyl ishinde bul merzim orta eseppen 10 jylǵa ósti. Osynyń bári memlekettiń júrgizgen saıasatynyń, osy salaǵa qoldaýynyń nátıjesi», - dedi B. Saparbaev «MÁMS: qazaqstandyq medıtsınanyń jańǵyrýy» forýmynda.
Onyń aıtýynsha, qazaqstandyq dárigerlerdiń halyqaralyq bedeli bar jáne ózge memleketterdiń azamattaryna da medıtsınalyq kómek kórsetip júr. Medıtsınalyq qyzmet sapasyn jaqsarta túsý úshin kelesi jyly elimizde mindetti áleýmettik medıtsınalyq saqtandyrý júıesi engiziledi.
«Biz Qazaqstannyń barlyq óńirin aralap, turǵyndarǵa MÁMS júıesiniń artyqshylyqtaryn túsindirdik. 99% daıyndyq bar dep aıtýǵa bolady. Biz úshin eń bastysy medıtsınalyq qyzmet alatyn turǵyndardyń tirkeýge turýy jáne sanaty. MÁMS boıynsha memleket esebinen turǵyndardyń 15 sanaty (10 mln adam) tegin qyzmet ala alady. Qalǵan 8 mln halyq óz esebinen nemese jumys berýshiler tarapynan qamatmasyz etiledi. Ázirge jergilikti atqarý organdarymen barlyq jumysty bitirdik», - dedi vıtse-prıemer.
Qaraǵandy oblysynda júrgizilgen pılottyq jobanyń jaqsy nátıje kórsetkenin jetkizdi. Bir adamǵa jumsalatyn shyǵyn shamamen 2,5 esege jaqsarǵan. Kóptegen adamdar kompıýterlik tomografııa men MRT ótý múmkindigin alǵan.
«Bul jumystardy jalǵastyramyz jáne qarjylandyrý boıynsha esh kedergi, esh qıyndyq bolmaıtynyn aıtqym keledi. Jalpy elimizdiń densaýlyq saqtaý júıesi úshin shamamen 1,5 trln teńge bólnedi. Qazir Áleýmettik medıtsınalyq saqtandyrý qorynda 270 mlrd teńge bar. Jyl saıyn jumys berýshiler men ózin-ózi jumyspen qamtyǵandar arqyly 500-700 mlrd teńge jınaý kerek. Bul densaýlyq saqtaý júıesine qosymsha qarjy kózi bolady», - dedi Berdibek Sapabaev.