Mindetti áleýmettik medıtsınalyq saqtandyrý salasynda jańa ózgerister oryn almaq
Bul jańa normalar «QR keıbir zańnamalyq aktilerine densaýlyq saqtaý jáne áleýmettik-eńbek salalary máseleleri boıynsha ózgerister men tolyqtyrýlar engizý týraly» zań jobasynda kórinis taýyp otyr.
Atap aıtqanda, óz jumyskerleri úshin jumys berýshilerdiń qaltasynan tólenetin jarnanyń kólemi tómendetildi. Bul týraly QR Densaýlyq saqtaý jáne áleýmettik damý vıtse-mınıstri Eljan Birtanov málim etti. Ol úshin MÁMS júıesi boıynsha, Densaýlyq saqtaý jáne áleýmettik damý mınıstrliginiń medıtsınalyq qyzmetke aqy tóleý komıtetiniń bazasynda arnaıy qor qurylady. Qorǵa aýdarylatyn jarnalardyń óz jumyskerleri úshin jumys berýshiler 2017 jyly - 2 paıyz, 2018 jyly - 3 paıyz, 2019 jyly - 4 paıyz jáne 2020 jyldan bastap 5 paıyz aýdarady dep mejelengen bolatyn. Endi jańa zań jobasy boıynsha, 2017 jyldyń 1 shildesinen - 1 paıyz, keıin 2022 jylǵa deıin 3 paıyzdy quramaq.
Qoldanystaǵy zańnamada, ózin ózi jumyspen qamtıtyn azamattar, ıaǵnı jeke kásipkerler, jeke notarıýstar, jeke sot oryndaýshylary, advokattar jáne azamattyq quqyqtyq sharttar boıynsha kiris alatyn basqa da jeke tulǵalar 2017 jyly - 2%, 2018 jyly - 3%, 2019 jyly - 5%, 2020 jyly - kiristeriniń 7 paıyzy kóleminde jarna tóleıdi dep belgilengen.
"Jańa zań jobasy boıynsha, ózin ózi jumyspen qamtıtyn azamattar, ıaǵnı jeke kásipkerler, jeke notarıýstar, jeke sot oryndaýshylary, advokattar jáne azamattyq quqyqtyq sharttar boıynsha kiris alatyn basqa da jeke tulǵalar úshin 2017 jyldyń 1 shildesinen bastap, birden kirisiniń 5%-yn qorǵa aýdarýdy mindetteý kózdelgen", - dedi E. Birtanov.
Al jumysshylardyń ózderi úshin qorǵa tóleıtin jarnalary jalaqynyń 2 paıyzyn quraıdy. Bul jarnany aýdarý 2019 jyldan bastap 1 paıyz kóleminde bolsa, 2020 jyldan bastap 2 paıyzdy quraıtyn bolady.
Aıta keteıik, Memleket basshysy mindetti áleýmettik medıtsınalyq saqtandyrýdy engizýdiń merzimderin ózgertýge baǵyttalǵan «Qazaqstan Respýblıkasynyń keıbir zańnamalyq aktilerine mindetti áleýmettik medıtsınalyq saqtandyrý máseleleri boıynsha ózgerister men tolyqtyrýlar engizý týraly» Qazaqstan Respýblıkasy Zańyna qol qoıǵan bolatyn .