Mindetti áleýmettik medıtsınalyq saqtandyrý boıynsha aqparattyq túsindirý jumystary jalǵasýda
ASTANA. QazAqparat - Elimizde mindetti áleýmettik medıtsınalyq saqtandyrý boıynsha aqparattyq túsindirý jumystaryn ońtaıly júrgizý maqsatynda barlyq óńirlerde óńirlik jáne respýblıkalyq shtabtar qurylǵan bolatyn.
Sonyń arqasynda respýblıkalyq shtab músheleri 8 myńnan astam, al óńirlik shtab músheleri 66 myńǵa jýyq medıtsınalyq qyzmetkerler arasynda aqparattyq túsindirý jumystaryn júrgizdi.
Qazaqstanda 2018 jyldyń 1 qańtarynan bastap, halyqaralyq ozyq tájirıbeni eskere otyryp ázirlengen, memlekettiń, jumys berýshiniń jáne ár adamnyń jaýapkershiligine negizdelgen jańa medıtsınalyq saqtandyrý júıesi engiziledi. Memleket belsendi emes halyq úshin jarnalardy júzege asyrady, al jumys berýshiler jaldamaly jumysshylary úshin jarna tóleıdi. Salyq organdarynda tirkelgen jumyskerler jáne ózin-ózi qamtamasyz etip otyrǵan azamattar jarnany ózderi úshin tóleıdi
Mindetti áleýmettik medıtsınalyq saqtandyrý boıynsha aqparattyq túsindirý jumystary 2016 jyldyń maýsym aıynan bastap júrgizilip keledi. 2016 jyldyń qyrkúıek aıynan bastap, jumys berýshiler, ózin ózi jumyspen qamtyǵandar, jumyssyzdar men iri kásiporyn jumysshylary arasynda aqparattyq túsindirý jumystary belsendi júrgizildi. Sonyń nátıjesinde 2 myńǵa jýyq kezdesýler uıymdastyryldy, 230 myńǵa jýyq adam qamtyldy.
2017 jyldyń basynan 1388 kezdesý uıymdastyrylyp, onda 146 myńnan astam adam aqparat aldy. Olardyń 40% - aýyl turǵyndary.
Mindetti áleýmettik medıtsınalyq saqtandyrý aıasynda saqtandyrylǵan azamattardy ambýlatorııalyq dárimen qamtamasyz etýmen birge ambýlatorııalyq-emhanalyq kómek kórsetý, statsıonarlyq medıtsınalyq kómek, joǵarytehnologııalyq medıtsınalyq qyzmetter, statsıonardy almastyratyn tehnologııalar, uzaqmerzimdi meıirbıkelik kútim usynylady.
Buǵan qosa, óz erkimen saqtandyrý jasaǵan azamattar jeke saqtandyrý kompanııalarymen jasalǵan shart negizinde, Mindetti áleýmettik medıtsınalyq saqtandyrý júıesinde kórsetilmegen medıtsınalyq qyzmetterge qol jetkize alady.
MÁMS boıynsha barlyq qajetti aqparatty Mindetti áleýmettik medıtsınalyq saqtandyrý Qorynyń saıtynan alýǵa bolady. Sondaı-aq, Facebook áleýmettik jelisinde «Qoljetimdi medıtsına» atty paraqsha bar. Almaty, Astana qalalarynda mınıstr, onyń orynbasary, Qor Basqarma tóraıymy jýrnalıster pýlymen, blogerlermen kezdesýler ótkizgen bolatyn. Jalpy aqparattyq túsindirý jumystary dóńgelek ústel aıasynda uıymdastyrylyp otyrady. Sondaı-aq, jetekshi iri respýblıkalyq telearnalarda, óńirlik arnalar men led ekrandar arqyly MÁMS boıynsha beınerolıkter kórsetilýde. Oǵan qosa, kınoteatrlardaǵy ár seans aldynda atalǵan aqparattyq túsindirý jumysy aıasynda beınerolıkter aınalýda.
Esterińizge sala keteıik, memleket, jumys berýshiler jáne óz-ózin qamtamasyz etetin azamattar áleýmettik medıtsınalyq saqtandyrý qoryna jarnalaryn 2017 jyldyń 1-shi shildesinen sala bastaıdy. ıAǵnı, shilde aıynan bastap áleýmettik medıtsınalyq saqtandyrý qory jumys isteýge kirisedi. Oǵan memleketten, jumys berýshilerden jáne turǵyndardan aı saıyn aqsha aýdarylady. Bul qarajat saqtandyrý júıesine qatysatyn halyqtyń barlyǵyn tegin medıtsınalyq kómekpen qamtamasyz etip otyrýǵa kepil bolady.
Sondaı-aq, mindetti áleýmettik medıtsınalyq saqtandyrýdy engizý nátıjesinde elimizde medıtsınalyq kómek kórsetý deńgeıi aıtarlyqtaı joǵarylaıdy, sondaı-aq dárigerlerdiń jalaqylaryn kóterýge múmkindik týady degen boljam bar.
