Myńdaǵan mıgrant, ondaǵan qurban: Seýtadaǵy qazirgi ahýal qandaı
ASTANA. KAZINFORM — Ispanııanyń Marokkomen shekarasyndaǵy Seýta anklavynda jappaı mıgratsııalyq daǵdarystan keıin jaǵdaı birtindep turaqtalyp keledi. Buǵan deıin óńirde tártipsizdikter bolyp, ondaǵan adam qaza taýyp, kóptegen adam ustalǵan edi, dep habarlaıdy Kazinform agenttigi TASS-qa silteme jasap.
Bul týraly jergilikti bılik ókilderi málimdedi.
— Aýmaqty qoqystan tazartý jumystary qarqyndy júrgizilip jatyr. Qoǵamdyq tártip pen kólik qozǵalysy birtindep qalpyna keltiriledi, — dedi Hespress portalyna «Bab-Sebta» shekaralyq ótkizý beketiniń ókilderi.
Beısenbiden jumaǵa qaraǵan túni mıgranttar men polıtsııa arasynda bolǵan qaqtyǵystar kezinde órtengen kólikterdiń qaldyqtary kóshelerden shyǵarylyp jatyr. Sonymen qatar Seýtadan shyǵarylǵan zańsyz mıgranttardy Marokkonyń shekara mańyndaǵy Fnıdek qalasyna jetkizetin shaǵyn avtobýstar qaıta qatynaı bastady. Seýta men Fnıdek arasyndaǵy avtojolda eki baǵyttaǵy kólik qozǵalysy da qalypty rejımge kóshti.
Soǵan qaramastan, shekaralyq ótkizý beketi men oǵan jaqyn aýdandarda polıtsııanyń kúsheıtilgen jasaqtary kezekshilik atqaryp jatyr. Olar buǵan deıin Ispanııanyń avtonomııalyq qalasyna zańsyz ótken adamdardyń Marokko aýmaǵyna qaıtarylýyn baqylap otyr.
Marokkonyń qaýipsizdik qyzmetterindegi derekkózdiń málimetinshe, keıingi birneshe kúnde «Bab-Sebta» beketi men Fnıdek qalasy mańyndaǵy qaqtyǵystar kezinde shamamen 70 adam ustalǵan. Qazir olar arandatýshylyq áreketter men jappaı tártipsizdikterge qatysy bar-joǵyn anyqtaý úshin qamaýda otyr.
Derekkózdiń aıtýynsha, ustalǵandarǵa kisi óltirýge oqtalý, qasaqana órt qoıý, memlekettik jáne jeke menshik múlikke zııan keltirý sııaqty aýyr aıyptar taǵylǵan.
Eske salaıyq, buǵan deıin Marokkodan Seýtaǵa ótpek bolǵan 67 mıgrant qaza tapqanyn habarlaǵanbyz.
Ispanııanyń Seýta anklavyna zańsyz ótken shamamen 50 myń mıgranttyń jartysynan kóbi Marokkoǵa qaıtaryldy.
Soǵan qaramastan, zańsyz mıgranttardyń shaǵyn toptary Fnıdek jaǵalaýyndaǵy tolqyn bógetin aınalyp ótý nemese teńiz arqyly júzip ótý arqyly Seýtaǵa jetýdi jalǵastyryp jatyr. Aqparatqa sáıkes, olar Marokkonyń qaýipsizdik kúshteri tarapynan aıtarlyqtaı qarsylyqqa tap bolmaı otyr.
Osydan keıin Italııa Ispanııamen aradaǵy Shengen kelisiminiń qoldanylýyn ýaqytsha toqtatyp, teńiz jáne áýe shekaralaryn japty.
Sondaı-aq Ispanııa mıgranttar legine baılanysty Seýtaǵa ásker jibergenin de jazǵanbyz.
