Myńdaǵan qonaqtan keıingi Naýryz: Kókshetaýlyqtar Tazarý kúni ekoaktsııasyna shyqty
KÓKShETAÝ. KAZINFORM — 23 naýryz — Naýryznama onkúndiginiń qorytyndy kúni, sımvoldyq máni zor Tazarý kúnine oraı Kókshetaý qalasynda «Taza el — bizdiń qolymyzda» atty ekologııalyq aktsııa ótti, dep habarlaıdy Aqmola oblysynyń ishki saıasat basqarmasy.
Tańerteń erte qaladaǵy «Jańa jaǵalaý» aýmaǵyna ekovolonterler, jastar belsendileri jáne qoǵam ókilderi jınalyp, merekelik is-sharalardan keıingi aýmaqty tazartýǵa kiristi.
Bıyl dál osy jaǵalaýda Kókshetaýdaǵy Naýryz meıramynyń negizgi dýmany ótken bolatyn. Myńdaǵan qala turǵyndary men qonaqtar otbasylarymen kelip, kontserttik baǵdarlamalardy tamashalap, ulttyq oıyndarǵa qatysyp, dástúrli taǵamdardan dám tatty. Bir kúnge bul aýmaq halyqtyq merekeniń úlken ashyq alańyna aınaldy.
Alaıda Naýryznama dástúri merekeni naqty istermen jalǵastyrýdy kózdeıdi. Onkúndiktiń sońǵy kúni — Tazarý kúni — tazalyq pen jańarýdyń belgisi. Bul kúni adamdar óz úılerin, aýlalaryn, kósheleri men qoǵamdyq oryndardy retke keltiredi. Sondyqtan halyqtyq merekeden keıingi kúni jastar men eriktiler jaǵalaýǵa qaıta jınalyp, onyń tazalyǵy men kórkin qalpyna keltirýge belsene atsalysty.
Shamamen eki júzge jýyq adam serýendeý aımaǵy boıyna bólinip, qoqys jınap, kógaldar men jaǵalaý syzyǵyn tazalady. Jumys uıymdasqan túrde, júıeli júrgizildi. Qatysýshylar aýmaqtyń bir bóliginen ekinshi bóligine jyljyp otyryp, jaǵalaýdy tolyq retke keltirdi. Kópshilik úshin bul ıgi is Naýryzdy maǵynaly túrde aıaqtaýdyń, jaqsylyqpen qorytyndylaýdyń bir kórinisine aınaldy.
— Tazarý kúni — Naýryznama onkúndiginiń mańyzdy bóligi. Ol jańarý men qorshaǵan ortaǵa degen jaýapkershilikti bildiredi. Keshe jaǵalaýda aýqymdy merekelik is-sharalar ótti, al búgin qala jastary men turǵyndary tazalyq jumystaryn júrgizýge shyqty. Bul — merekeni naqty istermen jalǵastyrýdyń jarqyn úlgisi, — dep atap ótti Kókshetaý qalalyq jastar resýrstyq ortalyǵynyń basshysy Aıanbek Halııhanuly.
Ekologııalyq bastamaǵa ásirese jastar belsendi qatysty.
— Keshe bul jerde adam óte kóp boldy, úlken merekelik sharalar ótti. Búgin biz kelip, aýmaqty tazalaýǵa kómektesýdi jón kórdik. Bul — bizdiń qalamyz. Ózimiz osy jerde demalamyz, serýendeımiz. Sondyqtan mundaı oryndardyń taza bolýy mańyzdy. Dostarymyzben birge osyndaı iske qatysý — paıdaly is jasap jatqanymyzdy sezindiredi, — dedi UNICEF eriktisi Danııal Jagýparov.
Osylaısha, Naýryznama onkúndigin qorytyndylaǵan Kókshetaý turǵyndary jańarý men tazalyq árbir adamnyń qarapaıym, biraq mańyzdy áreketterinen bastalatynyn is júzinde kórsetti.
