Portýgalııa azamattyǵyn alý úshin myńdaǵan ızraıldik kezekke turdy

ASTANA. KAZINFORM — Myńdaǵan adam Portýgalııa azamattyǵyn alý úshin Izraıldegi elshilik aldynda uzyn-sonar kezekke turdy, dep habarlaıdy Anadoly.

Times of Israel saıtynyń málimetinshe, elshilik turǵyndardyń ınternet arqyly qabyldaýǵa jazylý kezinde kedergilerge tap bolýyna baılanysty «Eski ýaqytqa oralý» dep atalatyn jeke qabyldaý kúnin uıymdastyrdy. Bul kópshiliktiń qyzyǵýshylyǵyn týdyrdy.

Portýgalııa azamattyǵyn alýǵa nemese portýgal tólqujatyn uzartqysy kelgen ızraıldikterdiń kezegi elshiliktiń kireberisinen jerasty avtoturaǵyna deıin sozylyp jatty. 

Izraıldikter úshin Portýgalııa azamattyǵy

2015 jyly Portýgalııa HVI ǵasyrdaǵy ınkvızıtsııa kezinde zardap shekken sefard evreıleriniń urpaqtaryna azamattyq alýǵa ótinish berý quqyǵyn qoldanatyn zań qabyldady. 2023 jyly ótinishterdiń kóp bolýyna baılanysty Portýgalııa úkimeti zańǵa qatań sharttar engizdi.

Izraıldikter Eýropalyq Odaq aýmaǵynda erkin júrip-turý, ondaǵy ýnıversıtetterge ońaı qol jetkizý jáne bilim berý shyǵyndaryn azaıtý úshin Portýgalııa azamattyǵyn alýǵa umtylady.

Izraıl Gaza sektoryna jappaı shabýyl jasaǵan 2023 jyldyń qazan aıynan beri ekinshi tólqujat izdegen ızraıldikterdiń sany aıtarlyqtaı ósti. On myńdaǵan turǵyn elden ketip, Portýgalııa azamattyǵyna qyzyǵýshylyq aıtarlyqtaı artty.

Eske salaıyq, osyǵan deıin Japonııa azamattyq alýǵa ótinish bildirgen sheteldikterdi tekserýdi kúsheıtkeni týraly jazdyq.