Qazaq modeli Shyńǵys Tanatpaev: modeldik mansap, álemdik kontraktiler jáne áskerdegi ómir

Shyńǵys Tanatpaev - Kókshetaý qalasynyń týmasy, qazir Qaraǵandydaǵy 5451 áskerı bóliminde qatardaǵy jaýynger. Áskerge kelgenine toǵyz aıǵa jýyqtaǵan ol jańa mindetin abyroımen atqaryp júr.

Karate shyńdaǵan minez, til keńeıtken kókjıek

Al endi keıipkerdiń oqıǵasyn basynan bastap tarqataıyq. Shyńǵys segiz jasynan bastap karateniń "kıokýshınkaı" atty túrimen aınalysady. Toǵyz jyl boıy shyǵys jekpe-jek ónerin meńgerip, sport pen oqýyn qatar alyp júrgen.

Osy ýaqyt ishinde túrli jarystarǵa qatysyp, el namysyn qorǵaǵan. Eńbegi elenip, sport sheberligine kandıdat atanǵan. Sondaı-aq Qazaqstannyń eki dúrkin chempıony bolǵan.

- Karatemen on jeti jasqa deıin aınalystym. El ishinde de, halyqaralyq jarystarda da top jardym. Kıokýshınkaı — karateniń eń qıyn ári erekshe túrleriniń biri. Jekpe-jek qorǵanyshsyz ótip, keıde sportshylar nokaýtqa túsip qalyp jatady. Bul sport meniń minezimdi shyńdap, denemdi shynyqtyrdy. Eń bastysy, naǵyz er minezdi bolýǵa tárbıeledi. Ári qaraı da jalǵastyrǵym kelgen, biraq ómir óz josparyn usyndy, - deıdi ol.

Ol 17 jasynda shyǵys jekpe-jegimen qoshtasyp, oqýyna den qoıady. Mektepti úzdik támamdaǵan jas jigit arman qýyp, elordaǵa keledi. Munda gıd-aýdarmashy mamandyǵy boıynsha kolledjge túsedi.

Stýdenttik shaǵynda qazaq, orys, aǵylshyn jáne túrik tilderin meńgergen ol búginde tórt tilde erkin sóıleıdi.

- Tilderdi úırenýim ómirimde kóp nársege jol ashty. Menińshe, adamda nıet pen tabandylyq bolsa, qandaı tildi bolsa da úırenýge bolady. Eń bastysy — qatelesýden qoryqpaý jáne kún saıyn az da bolsa turaqty túrde ýaqyt bólip otyrý, - dedi Shyńǵys Tanatpaev.

Bir usynystan bastalǵan jańa ómir

Syr-symbaty men bilimin qatar alyp júrgen ol modeldik jolyn da Astanada bastaǵan. Qyzyǵy, bul salaǵa ony aldyn ala qurǵan jospary emes, kezdeısoq jaǵdaı alyp kelgen.

- Barlyǵy Astana qalasynda bastaldy. Oqýyma baılanysty Kókshetaýdan elordaǵa kóship barǵan edim. Bir kúni kóshede modeldik agenttikte jumys isteıtin qyz meni kezdeısoq baıqap, óz agenttigine shaqyrdy. Usynysyn qabyldap, agenttikke bardym. Osylaısha modeldik jolym bastalyp ketti, - deıdi model.

Osylaısha ol aıaqasty múlde jańa salaǵa qadam basady. Boıy men kelisti kelbeti jas jigitti sán ındýstrııasyna jeteleıdi. Qyzyǵy, modeldik mansabyn endi bastaǵanyna qaramastan, kóp uzamaı halyqaralyq podıýmdarǵa shaqyrtý alady.

- Modeldik agenttikte jumys istep júrgen kezimde Pierre Cardin kórsetilimine arnalǵan kastıngke qatystym. Bul jabyq kórsetilim bolatyn. Júzdegen modeldiń arasynan meni tańdady. Ol kezde nebári 17 jasta edim, modeldik mansabymdy endi bastap jatqan kezim. Bul meniń sán álemindegi alǵashqy úlken jetistigim, - deıdi ol.

Frantsııanyń áıgili Pierre Cardin sán úıiniń kollektsııasyn tanystyrǵan Shyńǵys osylaısha sheteldegi alǵashqy podıýmyna shyǵady. Onyń aıtýynsha, sol kezde bir obrazynyń quny 10 myń dollarǵa deıin jetken. Al bir galstýktiń ózi 3 myń dollar turǵan. Bul — onyń modeldik jolynda tanystyrǵan eń qymbat kıimderiniń biri.

Sán álemindegi shekarasyz jeti jyl

Sán álemin symbatymen baǵyndyrǵan jas jigitke sheteldik sán úılerinen kóp usynys túsken. Italııanyń Federico Barrazzo jáne Sauvage Multi brendteriniń kollektsııalaryn tanystyryp, álemniń túrli elderinde ótken kórsetilimderge qatysqan.

- Ár jyldary túrli jobalarǵa qatystym. Túsirilimderge, jarnamalyq rolıkterge, jýrnaldar men bılbordtarǵa shyqtym. Sondaı-aq sán kórsetilimderi men feshn-shoýlarǵa da qatystym. Coca-Cola, DeFacto, ASUS jáne Colgate sekildi tanymal brendterdiń jarnamalyq túsirilimderine tústim, - deıdi ol. 

Al 18 jasynda Shyńǵys sheteldik modeldik agenttiktermen óz betinshe jumys isteýge bel býady. Osylaısha Túrkııaǵa attanyp, bes jylyn sonda ótkizgen. Sán kórsetilimderine qatysa júrip, bilimin de jalǵastyrǵan.

- Túrkııada birneshe modeldik agenttikpen jumys istedim. Bir kelisimshartym aıaqtalǵannan keıin basqa agenttikpen jumys istep júrdim. Keıin óz klıentterimdi jınaqtap, frılansqa aýystym.

Odan keıin keıipkerimiz Taıland pen Fılıppındegi tanymal modeldik agenttikterden de shaqyrtý alǵan. Ár elde úsh aıdan alty aıǵa deıin jumys istegen. Sol kezde táýekelge baryp, ár usynysty qabyldaǵanyna qazir qýanady. Óıtkeni sheteldegi sol jyldar ol úshin mol tájirıbemen qatar, umytylmas estelikke aınalǵan.

- Ár túsirilim ózinshe este qalady. Óıtkeni árqaısysynda jańa komanda, jańa orta, jańa lokatsııa bolady. Ásirese sán kórsetilimderinde tájirıbesi mol, kásibı modeldermen birge jumys isteısiń. Olarǵa qarap, kóp nárse úırenesiń, ózińe qajetti tájirıbe jınaısyń. Kórgen-bilgeniń keıin ózińmen jumys isteýge, kásibı turǵyda damýǵa kómektesedi, - deıdi ol.

Bir túsirilimnen birneshe myń dollar: sánqoı jigit qansha tabys tapty?

Sánqoı jigit jeti jyl ishinde otandyq jáne sheteldik dızaınerlermen, modeldik agenttiktermen jumys istegen. Uzaq sapar, túsirilimge daıyndyq, qatań tártip pen ózin kútý — onyń kúndelikti daǵdysyna aınalǵan.

Osy tusta Shyńǵystan jeti jyldyq modeldik jolynda tapqan eń qomaqty tabysy týraly da suradyq.

- Naqty qansha tabys tapqanymdy aıta almaımyn, sebebi bul — qupııa aqparat. Biraq bir túsirilimnen birneshe myń dollar alǵan kezderim boldy. Al modeldik agenttikter gonorardan bólek, ushý bıleti, turatyn jerim jáne tamaqtaný shyǵyndarymdy da óteıtin, - deıdi Shyńǵys Tanatpaev.

Budan keıin ol áńgime aýanyn modeldik jolyndaǵy qyzyqty oqıǵalarǵa burdy.

Onyń aıtýynsha, modelderdiń jumysy syrt kózge ońaı kórinedi. Ádemi kıim kıip, kórermen aldynda birneshe mınýt júrý ǵana sııaqty. Alaıda sol birneshe mınýttyń artynda úlken daıyndyq pen eńbek jatyr.

Birinshiden, modelge qoıylatyn talap joǵary: boıy, dene bitimi men júris-turysy mańyzdy. Ekinshiden, podıýmda nyq júrip ótip, kıimdi jyldam aýystyryp, qaıtadan sahnaǵa minsiz shyǵý ózinshe bir óner.

- Aınalańda júzdegen adam bolady. Bári saǵan qarap, sýretke túsirip, vıdeoǵa túsirip jatady. Bir kórsetilimde birneshe kıimmen shyǵatyn kezder de bar. Tolqyǵan kezde kıimderdi shatastyryp nemese teris kıip qoıǵan sátter bolady. Ýaqyt az, sol kezde birneshe adam kómektesedi. Keıde dızaınerler óte kúrdeli, fýtýrıstik kıimder daıyndaıdy. Olardy qalaı kıip, qalaı sheshý keregin túsinbeı qalatyn kezder de bolady, - deıdi ol.

Sán áleminen áskerı sapqa

Elge oralǵan soń Shyńǵystyń basty maqsaty — Otan aldyndaǵy boryshyn óteý boldy. Búginde onyń podıýmdaǵy nyq qadamy saptaǵy áskerı júriske ulasqan.

- 2025 jyly Qazaqstanǵa qaıtyp keldim. Kóp oılanbastan, áskerge barýǵa sheshim qabyldadym. Mundaǵy tártip maǵan qıyn bolǵan joq. Tańǵy saǵat 6-da oıanasyń, dene shynyqtyrý jattyǵýyn jasaısyń, tańǵy as ishesiń. Barlyǵy belgilengen keste boıynsha ótedi. Model bolyp júrgen kezimde de osyndaı tártipke úırengen edim, - deıdi sarbaz.

Shyńǵystyń aıtýynsha, áskerı qyzmet oǵan jaýapkershiligin shyńdap, jańa orta qalyptastyrýǵa múmkindik bergen.

- Maǵan áskerdegi ómir óte unaıdy. Munda kóptegen jaqsy jigittermen tanystym. Qazaqstannyń túkpir-túkpirinen kelgen azamattarmen birge qyzmet etip júrmiz. Bir jyl boıy birge oıanyp, birge uıyqtap, birge jattyǵamyz. Sondyqtan áskerdegi ár kúnimnen keremet áser alyp jatyrmyn, - deıdi ol.

Bir qyzyǵy, Shyńǵystyń modeldik joly men karatedegi jetistikterin janyndaǵy sarbazdar bilmegen. Bul qyrlaryn alǵash estigende, olar tańǵalǵan. Tipti keıbiri áskerı boryshyn ótep bolǵan soń, Shyńǵyspen birge modeldik salany baıqap kórgisi keletinin de aıtqan eken.

Munda bári teń, bir-birimen joldas. Áskerı orta olardyń jaýapkershiligin arttyryp, er jigitke tán qasıetterin shyńdap jatyr. Shyńǵystyń aıtýynsha, ýaqyt sozbaı, 18 jasta áskerge barǵan jón. Óıtkeni bul jasta adam tártipke tez beıimdelip, minezi qalyptasady.

- Bul – er adam úshin óte jaqsy tájirıbe. Munda bir jyl qyzmet etý adamdy moraldyq, fızıkalyq jáne psıhologııalyq turǵydan bolashaqqa daıyndaıdy. Ásirese 18-19 jasqa tolǵan jigitter áskerge barýdy keıinge qaldyrmaı, erterek baryp kelgeni durys dep oılaımyn, - deıdi Shyńǵys Tanatpaev.

Shyńǵystyń aldaǵy baǵyty — Azııa

Shyńǵystyń aldaǵy jospary da aıqyn. Ol sán álemindegi mansabyn jalǵastyryp, bul joly Azııa elderiniń dızaınerlerimen jumys isteýdi qalaıdy.

- Áskerden keıin Astanaǵa qaıtyp kelip, Jańa jyldy qarsy alýdy josparlap otyrmyn. Merekeden keıin aldaǵy kelisimsharttarymdy josparlaımyn. Aldymen Vetnamǵa, odan keıin Malaızııaǵa barǵym keledi. Qazirdiń ózinde sol elderdegi modeldik agenttikterdi izdep, birtindep qarap júrmin, - deıdi model.

Ol ádette sheteldik modeldik agenttiktermen beınebaılanys arqyly kelissóz júrgizedi. Eki taraptyń talaptary kóńilinen shyqsa, kelisimshart jasalady.

Al joǵary bilimdi akterlik baǵytta alýdy josparlap otyr. Bul jóninde áli naqty sheshim qabyldamapty. Sánqoı jigit bolashaqta óz kıim brendin qalyptastyrýdy da oılaıdy.

- Biraz úzilisten keıin modeldik mansabyma qaıta oralyp, ony jańa baǵytta damytqym keledi. Medıa aýdıtorııamdy kóbeıtip, tanymaldylyǵymdy arttyrý da josparda bar. Al bolashaqta óz brendimdi ashyp, ony damytqym keledi. Túrkııada kıim tigetin sapaly fabrıkalar kóp. Solarmen kelisip, óz brendimdi shyǵarýǵa múmkindik bar dep oılaımyn, - deıdi ol.

Shyńǵystyń modeldik jolyndaǵy basty qoldaýshysy — anasy

Shyńǵystyń otbasy da sán áleminen alys emes. Ápkesi Kókshetaýdaǵy sulýlar baıqaýynyń júldegeri atanǵan. Alǵashynda anasy qyzyn model bolýǵa baǵyttaǵysy kelgen. Keıin ulynyń boıynan da bul qabiletti baıqap, onyń tańdaýyna qoldaý kórsetken.

Qazir Shyńǵys podıýmǵa shyqqanda, anasy ár jetistigine qýanyp, maqtanyshpen qarap otyrady.

- Modeldikke kelýime sebep bolǵan adamdardyń biri — anam. Ol meni bala kezimnen úzdik bolýǵa, óz jolymdy qalyptastyrýǵa tárbıeledi. Modeldikti baıqap kórý týraly sheshimimdi de qoldady. Boıym men syrtqy kelbetimniń bul salaǵa saı keletinin aıtty. Sóıtip, modeldikpen aınalysa bastadym. Anam osy ýaqytqa deıin meni qoldap keledi, maqtan tutady, - deıdi Shyńǵys Tanatpaev.

Qazaq qyzdarynyń kelbeti sheteldik podıýmda suranysqa ıe

Sán áleminiń serisinen bul joly Qazaqstan men sheteldegi modeldik ındýstrııanyń aıyrmashylyǵy men ereksheligin suradyq.

Onyń aıtýynsha, 2017 jyldary Qazaqstandaǵy modeldik ındýstrııanyń deńgeıi qazirgiden áldeqaıda tómen bolǵan.

- Ol kezde álemdik arenada qazaqstandyq modelder az edi. Qazir jaǵdaı ózgerdi. Qazaqstandyq modelderdi shetelge shyǵaryp, halyqaralyq deńgeıde tanystyratyn agenttikter kóbeıdi. Qazir shetelde jumys istep júrgen qazaqstandyq modelderdi jıi kezdestiremin. Ásirese qyzdarymyz kóp, jigitter az, - deıdi ol.

Shyńǵystyń sózinshe, shetelde model qazaq qyzdaryna suranys joǵary. Sebebi olardyń syrt kelbeti erekshe ári tartymdy.

- Azııaǵa tán kelbetimen qatar, úlken kózderi men aıqyn bet pishinderi bar. Mundaı erekshelikter modeldik ındýstrııada joǵary baǵalanady. Qazaq qyzdarynyń kelbeti azııalyq jáne eýropalyq stıldiń arasynda úılesimdi kórinedi, - deıdi Shyńǵys Tanatpaev.

Otandyq dızaınerlerdiń kıimderi de shetelde birden kózge túsedi. Shyńǵystyń aıtýynsha, dızaınerler qoldanatyn ulttyq naqyshtaǵy atrıbýttar men oıý-órnekter sheteldikterge erekshe ári eksklıýzıvti kórinedi.

Aıta keteıik, buǵan deıin qazaqstandyq dızaınerler Djeı Lonyń sahnalyq kostıýmderin daıyndaǵany jaıly jazǵan edik.