Myńdaǵan atlet daıyndap, el chempıonatyna bir sportshy jibermegen óńirler bar – Kelbet Nurǵazına
ALMATY. KAZINFORM – Almaty oblysynda ornalasqan Olımpıadaǵa daıarlaý ortalyǵynda halyqaralyq Ǵusman Qosanov atyndaǵy jarys ótedi. Onyń aldynda QR Jeńil atletıka federatsııasy baspasóz máslıhatyn ótkizdi.
Jeńil atletıka federatsııasynyń bas hatshysy Kelbet Nurǵazınanyń aıtýynsha, jeńil atletıka – elimizdegi negizgi buqaralyq sport túrleriniń biri. Degenmen, kásibı deńgeıde keı óńirler áli de kenje qalyp otyr.
– Qazir respýblıka boıynsha 7,8 myńnan astam sektsııada 340 myńdaı bala shuǵyldanady. Óńirlerdi alatyn bolsaq, TOP-3 ishinde Qaraǵandy oblysy, Shyǵys Qazaqstan oblysy jáne Almaty qalasy bar. Sosyn Shymkent, Soltústik Qazaqstan oblystarynda jaqsy damyǵan. Shamaly aqsap kelgen óńirlerimiz de bar. Atap aıtar bolsaq, Batys Qazaqstan oblysynda adam azdaý, al Aqtóbeden el chempıonatyna múldem qatyspaǵan sportshylar da bar. Atyraýdyń statıstıkasyn qarasaq, onda 12 myńnan astam sportshy jáne 95 jattyqtyrýshy bar. Alaıda chempıonatqa birde-bir sportshy kelmegen. Bul neni bildiredi dep aıtsańyz, keıbir óńirlerde jeńil atletıkanyń jaǵdaıy máz emes. Endigi kezekte federatsııa osyǵan kóńil bólmek, - dedi ol.
Sondaı-aq federatsııasynyń bas hatshysy jeńil atletıka boıynsha álemdik standarttarǵa sáıkes keletin ınfraqurylymnyń áli de az ekenin atap ótti. Onyń aıtýynsha, bul baǵytta memlekettiń qoldaýymen jumys jalǵasady.
– Qazaqstan boıynsha álemdik World Athletics boıynsha sertıfıkattalǵan jalǵyz stadıon – Olımpıadaǵa daıarlaý ortalyǵynda ornalasqan stadıon. Biraq ol jerde kóptegen sport túrlerinen oqý-jattyǵý jıyny ótedi. Sondyqtan biz Ǵusman Qosanov memorıaly sekildi jarystardy ótkizip jatsaq, ózge quramalardyń oqý-jattyǵý jıyndarymen qatar kelip qalýy múmkin. Odan bólek Almatynyń Ortalyq stadıonynda jóndeý jumystary kezinde júgirý jolaqtary alynýy múmkin degen sybys boldy. Bizdiń tarapymyzdan bul jolaqtardy almaı, ári qaraı jeńil atletıkanyń damýyna úlesin qossa degen usynys bar. Sondaı-aq Qyzylorda qalasynda da úlken stadıon salynyp jatyr. Biz jeńil atletıkadan júgirý jolaqtary eskerilse dep federatsııa atynan hat joldadyq. Alda jospar kóp, onyń bárin mınıstrliktiń qoldaýymen birte-birte sheshemiz, - dedi Kelbet Nurǵazına.
Eske salaıyq, buǵan deıin jeńil atletıkadan ulttyq qurama sapyna jańa sheteldik sportshylar qosylýy qanshalyqty múmkin ekenin jazǵanbyz.