Myńdaǵan almatylyq gazsyz qaldy: kináliler jaýapqa tartylady
ALMATY. KAZINFORM – Almatynyń Túrksib aýdanynda zaqymdanǵan gaz qubyry qalpyna keltirildi.
Almaty ákimdiginen málim etkendeı,Túrksib aýdanyndaǵy káriz qubyrlaryn óz betinshe tóseý barysynda búlingen ortasha qysymdy jerasty gaz qubyry kommýnaldyq qyzmettiń jedel is-qımylynyń arqasynda qalpyna keltirildi.
– «Ý Asımy» mekemesine káriz qubyrlaryn óz betinshe tartý barysynda zaqymdanǵan. Jeke tulǵalar qalalyq qyzmetterdiń kelisiminsiz túnde asfaltty oıyp, gaz qubyryn zaqymdaǵan. Saldarynan birneshe qazandyqtyń jumysy toqtatyldy, - dep atap ótti ákimdikten.
Jóndeý-qalpyna keltirý jumystaryna «QazaqGaz Aimaq» AQ-nyń 150 jumysshysy men 6 tehnıka jumyldyryldy. Tutynýshylardyń bir bóligin úzdiksiz jylýmen qamtamasyz etý maqsatynda «ATKE» JShS-niń «Áýejaı» qazandyǵy májbúrli túrde rezervtik otyn – mazýtqa aýystyryldy.
– Saǵat 14:00-degi jaǵdaı boıynsha gaz qubyryndaǵy aqaý joıyldy. Mamandar júıege qysym synaǵyn júrgizedi, sodan keıin tutynýshylardyń qaýipsizdigin qamtamasyz etý maqsatynda árbir úıge baryp, gazdy kezeń-kezeńimen qosý jumystaryn júrgizedi. Turǵyndardy qaýipsizdik tehnıkasyn saqtaýǵa jáne gazdy ózdiginen qospaýǵa shaqyramyz, - delingen habarlamada.
Almatynyń qala qurylysy baqylaý basqarmasy bul fakt boıynsha jospardan tys tekserý jumystaryn bastady. Sonyń nátıjesinde ákimshilik sharalar qabyldanyp, zańbuzýshylyqtardy joıý týraly nusqama beriledi.
Sonymen qatar buzýshylyq saldaryn joıýǵa ketken barlyq shyǵyn kináli tulǵaǵa júkteledi.
Osyǵan deıin Almatyda 10 myńǵa jýyq páter men úı gazsyz otyrǵany týraly jazǵan edik.