Myńdaǵan aqmolalyq «Taza Qazaqstan» ekologııalyq marafonyna qatysty
KÓKShETAÝ. KAZINFORM – Búgin – Dúnıejúzilik qorshaǵan ortany qorǵaý kúni jáne Ekolog kúnine oraı Aqmola oblysynda respýblıkalyq «Taza Qazaqstan» baǵdarlamasy aıasynda aýqymdy ekologııalyq is-sharalar ótip jatyr.
Ekologııalyq marafonnyń basty alańdary Kókshetaý qalasy men Esil aýdany boldy. Munda belsendiler, eriktiler, memlekettik qyzmetshiler jáne turǵyndar qorshaǵan ortany taza ári jaıly etý maqsatynda bir maqsatqa jumyldy.
Kókshetaý qalasynda aktsııanyń negizgi alańdarynyń biri «Báıterek» saıabaǵy boldy. Munda tazalyq jumystaryna 100-ge jýyq erikti men stýdent qatysty.
Qatysýshylar saıabaq aýmaǵyn sanıtarlyq tazalaýdan ótkizip, 1 tonna qoqys jınap shyǵardy. Sonymen qatar 24 gektar aýmaqta shóp shabý jumystary júrgizildi.
– Jyl basynan beri «Taza Qazaqstan» aktsııasy aıasynda kóptegen is-shara uıymdastyryldy. Sonyń nátıjesinde aýlalar tazartylyp, kósheler abattandyryldy, júzdegen aǵash kóshetteri otyrǵyzyldy. Bul jumystar aldaǵy ýaqytta da jalǵasyn tabady, - dedi Aqmola oblysy ishki saıasat basqarmasy basshysynyń orynbasary Sabyrhan Kenjebaev.
Senbilikke qatysýshylardyń kópshiligi úshin týǵan qalanyń tazalyǵyna qamqorlyq jasaý kúndelikti ómir saltyna aınalǵan. «Meıirim» eriktiler uıymynyń ókili Ásem Nábıeva stýdentterdiń aktsııaǵa belsendi túrde qoldaý kórsetkenin atap ótti.
– Búgin biz bul aktsııaǵa Kókshetaý qalalyq Jastar resýrstyq ortalyǵymen birlesip qatysyp otyrmyz. Uıymymyzdan shamamen 12 stýdent kelip, aýmaqty tazalaý jumystaryna úlken yntamen kiristi. Bizdiń basty maqsatymyz – súıikti qalamyzdyń taza ári kórikti bolýyna óz úlesimizdi qosý, - dedi Ásem Nábıeva.
Ekolog kúni Esil aýdanynda da joǵary deńgeıde atalyp ótti. Merekelik is-sharalar Esil qalasynyń ortalyq alańynda ótken ekologııalyq fleshmobpen bastalyp, oǵan oqýshylar, stýdentter men eriktiler qatysty. Keıin «Móldir bulaq» aktsııasy uıymdastyrylyp, 120-dan astam adam jaǵalaý aýmaqtaryn tazalaý jumystaryna jumyldyryldy. Qatysýshylar Súrgen stansasy mańyndaǵy Esil ózeniniń jaǵalaýynan turmystyq qaldyqtardy jınap, aýmaqty retke keltirdi.
«Taza Qazaqstan» aktsııasy oblystyń ózge aýdandarynda da keń qoldaý tapty. Arshaly aýdanynda senbilikke 1 200-den astam adam qatysyp, saıabaqtar men sý aıdyndarynyń jaǵalaýlaryn qoqystan tazartty.
Birjan sal jáne Jarqaıyń aýdandarynda turǵyndar Derjavınsk qalasyndaǵy Esil ózeniniń jaıylmasyn tazalap, ıppodrom aýmaǵyn retke keltirip, jas kóshetterdi kútip-baptaý jumystaryn júrgizdi.
Al Shortandy jáne Qorǵaljyn aýdandarynda aktsııaǵa qatysýshylar aýyldyq okrýgterdiń kóshelerin tazalap, jańa aǵash kóshetterin otyrǵyzdy. Osylaısha, óńirdiń túkpir-túkpirinde ótken ekologııalyq is-sharalar turǵyndardy ortaq maqsatqa biriktirip, eldi mekenderdi kórkeıtýge jáne qorshaǵan ortany saqtaýǵa qosylǵan mańyzdy úleske aınaldy.
