Mına jazyǵynda qaza tapqandar týraly resmı málimet jarııa etildi
ASTANA. QazAqparat - Mekkeniń irgesindegi Mına jazyǵynda bolǵan qaıǵyly oqıǵadan qaza tapqandar sany 769-ǵa jetti. Budan basqa, 934 adam jaraqat alǵan. Mundaı resmı málimetti Saýd Arabııasynyń densaýlyq saqtaý mınıstrligi jarııa etti, dep jazady khabar.kz.
Al osy eldiń ishki ister mınıstrligi qajylyq rásimderin oryndaý barysyndaǵy qaýipsizdikti qamtamasyz etý úshin taǵy júz myń qyzmetker bólgen.
Esterińizge sala keteıik, qaıǵyly oqıǵa 24-shi qyrkúıekte Mına jazyǵynda shaıtanǵa tas laqtyrý rásimin atqarý kezinde bolǵan.
«Biz kóptegen qurbandardyń denesin týystaryna berdik. Jerleýge daıyndyq bastalyp ketti. Bul jumystar qaıǵyly oqıǵadan keıin 2 kún ishinde tez qolǵa alyndy. Biraq áli jeke basy anyqtalmaǵan marqumdar bar. Tıisti qaýipsizdik organdary men sot-medıtsına qyzmetkerleri qaıǵyly oqıǵanyń sebepterin áli tergep jatyr», - Saýd Arabııasynyń Densaýlyq saqtaý mınıstri Halıd Ál-Falıh.
Aıta keteıik, bizdiń elimizden qajylyq paryzyn óteýge barǵan qazaqstandyq 78 jastaǵy M.Mansurova esimdi qarııa júrek aýrýynan jergilikti emhanalardyń birinde em júrgizý barysynda kóz jumdy. 1937 jyly týǵan áje egde jastaǵy densaýlyǵy men jaǵdaıyna qaramastan jalǵyz kelgen eken. Qazaqstan Qajylyq Mıssııasy budan bylaı egde jastaǵy qarııalardy jaqyn týystarynsyz qajylyqqa jibermeý týraly talap qoıady. Foto: www.ntv.ru
