Myń túıeden quralǵan kerýen Gınnestiń rekordtar kitabyna endi

ASTANA. KAZINFORM — Álemdik jetistik sertıfıkatyn Gınnestiń rekordtar kitabynyń ókili Rıchard-Ýılıam Stennıng tabystady, dep habarlaıdy Almaty oblysynyń ákimdigi.

Almaty oblysynda bir órkeshti myń túıeden quralǵan kerýen resmı túrde Gınnestiń rekordtar kitabyna endi. Bir shaqyrym qashyqtyqty júrip ótken kerýen 20 qyrkúıekte Іle aýdanynyń Kúrti aýylynda uıymdastyrylǵan bolatyn.

Gınnestiń rekordtar kitabynyń ókili Rıchard-Ýılıam Stennıng qazaqstandyq jobanyń ereksheligine erekshe toqtald.

— Bul — aıryqsha jaǵdaı. Ózge elderde mundaı kerýender ártúrli adamdardyń janýarlarynan quralady — birinde tórt túıe, ekinshisinde eki túıe bolady. Al Qazaqstanda myń túıeniń bári bir adamnyń ıeliginde. Bul — rekordty shynymen de erekshe ári biregeı etedi. Qazaqstan meni tańǵaldyrdy, endi bul elge týrıst retinde de kelgim keledi, — dedi ol.

Almaty oblysynyń ákimi Marat Sultanǵazıev te bul oqıǵanyń el úshin mańyzyn atap ótti.

— Rekordtyń resmı túrde moıyndalýy — bizdiń ulttyq rýhymyz ben mádenı muramyzǵa kórsetilgen úlken qurmet. Myń túıeden quralǵan kerýen halyqty biriktirip, qazaq dástúriniń sımvolyna aınaldy, — dedi aımaq basshysy.

Ideıa avtory ári kerýen ıesi, «Daýlet-Beket» JShS dırektory Sydyq Dáýletov jobany daıyndaýǵa jarty jyl ýaqyt ketkenin aıtty.

— Túıe — erkindikke úırengen janýar. Myń túıeni birge jınaý ońaı bolǵan joq. Biraq maqsat pen senim bolsa, múmkin emes dúnıe joq. Aldaǵy ýaqytta shubat festıvalin ótkizýdi josparlap otyrmyz. Halyqqa osyndaı dástúrimizdi jańǵyrtatyn sharalar qajet, — dedi ol.

Budan buryn qyrkúıekte álemdegi eń úlken túıe kerýeni Almaty oblysy Іle aýdanynyń Kúrti aýyldyq okrýginde júrip ótkenin jazǵanbyz.