«Myń bala» ulttyq olımpıadasyna tirkelý júrip jatyr

ASTANA. KAZINFORM — Aýyl mektepterinde oqıtyn oqýshylarǵa arnalǵan «Myń bala» ulttyq zııatkerlik olımpıadasyna tirkelý bastaldy. Jobany jetinshi jyl qatarynan QR Oqý-aǵartý mınıstrligi men «El Umiti» korporatıvtik qory uıymdastyryp keledi. Bul týraly «Myń bala» jobasynyń jetekshisi Abylaıhan Qaırolla habarlady.

Olımpıadanyń basty mıssııasy — aýyl oqýshylaryna sapaly bilim alý múmkindigin jasaý. Jeńimpazdar elimizdegi bedeldi mamandandyrylǵan bilim ordalary — respýblıkalyq fızıka-matematıka mektebi, «Bilim-Innovatsııa» lıtseıleri jáne «Daryn» mektepterinde oqý múmkindigine ıe bolady.

— Joba bastalǵaly beri olımpıadaǵa aýyl mektepterinde bilim alatyn 817 myńnan astam 6-synyp oqýshysy qatysty. Solardyń arasynan 6000 oqýshy jeńimpaz atanyp, 1800-den astamy daryndy balalarǵa arnalǵan mamandandyrylǵan mektepterge qabyldanǵan. Al byltyr «Myń bala» olımpıadasynyń alǵashqy 144 túlegi mektepti támamdap, joǵary oqý oryndaryna oqýǵa tústi. Bul — jobanyń nátıjesin kórsetetin kórsetkish, — dedi spıker Jibek Joly telearnasynyń «Búgin Live» baǵdarlamasynda.

Olımpıadaǵa qatysý tegin. Bıyl tirkelý 20 aqpan men 20 naýryz aralyǵynda 1000bala.elumiti.kz saıtynda júrgiziledi. Baıqaý eki kezeńnen turady: alǵashqy irikteý onlaın ótedi, ekinshi kezeńde jeńimpazdar bilimderin tereńdetip kórsetedi.

Olımpıadadan tabysqa jetken oqýshylar da óz tájirıbelerimen bólisti. Aqmola oblysy, Sandyqtaý aýdanynyń týmasy Zeınat bul aýyl balalary úshin úlken múmkindik ekenin aıtty.

— Az-azdan úzdiksiz daıyndaldym. Keıin jemisin kórdim. Jańa mektepke kelgende básekelestik kúsheıdi. Biraq jańa ortaǵa tez beıimdeldim, — dedi oqýshy.

Buǵan deıin Kazinform tilshisi ınklıýzıvti bilim berý júıesin damytýda qandaı kedergiler baryn tarqatqan bolatyn.