«Mılton» daýylynan qaza tapqan adamdar sany artty

ASTANA. KAZINFORM – Florıdada «Mılton» daýyly qurbandarynyń sany 14 adamǵa jetti, dep habarlaıdy NBC News. 

Tornado paıda bolǵan Atlant muhıty jaǵalaýyndaǵy Sent-Lıýsı okrýginde osy ýaqytqa deıin 5 adamnyń qaza tapqany rastaldy. Polıtsııa málimetinshe, Sent-Petersbýrgte eki adam qaza tapty. Volýsııa okrýginiń sherıfi úsh adam mert bolǵanyn habarlady. Sıtrýs okrýginde kólik ústine aǵash qulap, er adam kóz jumǵan. 

Keltirilgen shyǵynnyń tolyq kólemi ázirge baǵalanǵan joq.

«Mılton» daýyly Florıdadany qýat kózderinen ajyratty. Qazirgi kezde 3,2 mln adam jaryqsyz otyr. Shtattaǵy kóptegen úı zaqymdanǵan, qıraǵan. Sent-Pıtersbergte jelden jergilikti beısbol stadıonynyń shatyry julynyp, oǵan jaqyn jerde kótergish kran qulaǵan.

Buǵan deıin AQSh-ta 5 mln-ǵa jýyq adam evakýatsııalaý týraly buıryq alǵany habarlanǵan bolatyn. 

Florida State University, University of Florida, University of South Florida jáne University of Miami-de bilim alyp júrgen qazaqstandyq stýdentter úıinde otyr. Oqý oryndary ýaqytsha jabylyp, oqý protsesi toqtatyldy.

Halyqaralyq baǵdarlamalar ortalyǵy «Mılton» daýylynyń Florıdaǵa jaqyndaǵanyna baılanysty jaǵdaıdy baqylap otyr.