«Mılton» daýyly Florıdaǵa jetti
ASTANA. KAZINFORM – Sarapshylar men quzyrly organdar Amerıkanyń Florıda shtatyna aýyr zardaptar ákelýi múmkin dep boljaǵan «Mılton» daýyly shtattyń batys jaǵalaýyna jetti, dep habarlaıdy VVS.
AQSh-tyń Ulttyq aýa raıy qyzmeti Grınvıch ýaqytymen saǵat 23:00 shamasynda daýyldyń eń kúshti lebi soǵatyn «kóz qabyrǵasy» (nemese «kózi») dep atalyp ketken perımetri – eń qaýipti bóligi jaǵalaýǵa jetkenin habarlady.
«Mılton» Florıdaǵa jetkenge deıin birshama báseńdep, eń qaýipti besinshi sanattan tórtinshige, sodan keıin úshinshi sanatqa (jel jyldamdyǵy 208 km/saǵ) aýystyryldy.
Alaıda, sarapshylardyń túsindirýinshe, «Mıltonnyń» qaýipi áli de seıilmeı tur: evakýatsııalanbaǵan adamdar úshin jeldiń jyldamdyǵy 4,5 metrge deıin jetetin tolqyn týdyryp, jaqyn mańdaǵy aýmaqtardy sý basyp ketý qaýpi bar, sondaı-aq ol teńiz jaǵasynan alys jerlerde de sý tasqynyn týdyratyn kúshti nóserge sebep bolýy múmkin.
VVS habarlaýynsha, Amerıkanyń Daýyldardy zertteý ulttyq ortalyǵy Grınvıch ýaqytymen túngi saǵat ekiniń shamasynda «Mılton» daýyly qurlyqqa jetkennen keıin birshama báseńdep, ekinshi sanatqa aýysqanyn jarııalady.
2-shi sanattaǵy daýyldy jeldiń turaqty jyldamdyǵy – 154-177 km/saǵ.
Eýropada qabyldanǵan Bofort shkalasy boıynsha turaqty (ekpinsiz) jyldamdyǵy 118 km/saǵ bolatyn jel daýyl bolyp sanalady. Saffır-Sımpson shkalasy boıynsha daýyl sanattary da osy belgiden bastalady.
Qazirgi kezde «Mıltonnyń» ortalyǵy Florıda túbegi arqyly soltústik-shyǵysqa, Atlant muhıtyna qaraı jyljyp barady.
CNN habarlaýynsha, AQSh-tyń Tótenshe jaǵdaılardy basqarý jónindegi federaldyq agenttiginiń basshysy Dıenn Krısvell florıdalyqtarǵa úıden shyqpaýyn eskertip, «Mıltonnyń» áli de qaýip tóndirip turǵanyn aıtty.
Onyń aıtýynsha, Florıdanyń 70 myńnan astam turǵyny bılik uıymdastyrǵan baspanalarǵa evakýatsııalanǵan.
Buǵan deıin AQSh-ta bes mıllıonǵa jýyq adam evakýatsııalaý týraly buıryq alǵany habarlanǵan bolatyn.
Florida State University, University of Florida, University of South Florida jáne University of Miami-de bilim alyp júrgen qazaqstandyq stýdentter úıinde otyr. Oqý oryndary ýaqytsha jabyldy, oqý protsesi toqtatyldy. Halyqaralyq baǵdarlamalar ortalyǵy «Mılton» daýylynyń Florıdaǵa jaqyndaǵanyna baılanysty jaǵdaıdy baqylap otyr.
