Mılorad Dodıktiń prezıdenttik mandaty joıyldy

ASTANA. KAZINFORM — Bosnııa jáne Gertsegovına Ortalyq saılaý komıssııasy Serb Respýblıkasynyń prezıdenti Mılorad Dodıktiń mandatyn joıdy, dep habarlaıdy DW. 

Komıssııa mundaı sheshimdi sot úkimi men saılaý týraly zańǵa súıene otyryp qabyldaǵany atap ótildi. Sheshimdi komıssııa músheleri biraýyzdan maquldady. Apellıatsııalyq shaǵym berý merzimi endi belgilenedi. Sheshim kúshine engennen keıin 90 kún ishinde merziminen buryn saılaý ótkizilýi tıis.

Osy jyldyń aqpan aıynyń sońynda sot Dodıkti Bosnııa jáne Gertsegovına boıynsha Joǵarǵy ókildiń sheshimin oryndamaǵany úshin kináli dep taýyp, bir jylǵa bas bostandyǵynan aıyrdy jáne alty jyl memlekettik qyzmette jumys isteýge tyıym saldy. Joǵary ókil – Bosnııa soǵysyn aıaqtaǵan Deıton kelisimderiniń oryndalýyn qadaǵalaıtyn halyqaralyq ókil.

Bul is boıynsha ekinshi aıyptalýshy, «Resmı aqparat» basylymynyń basshysy Mılosh Lýkıch kinásiz dep tanylyp, aqtaldy.

Prokýratýranyń qorytyndysyna sáıkes, Dodık pen Lýkıch halyqaralyq ókildiń tyıymyna qaramastan óz qyzmetin jalǵastyrǵan. Úkim jarııalanǵannan eki kún ótken soń prokýratýra Dodıkti ǵana emes, Serb Respýblıkasy úkimetiniń basshysy Radovan Vıskovıch pen Ulttyq májilis tóraǵasy Nenad Stevandıchti de qamaýǵa alýdy talap etti.

Alaıda Dodık ózine taǵylǵan aıyptardy zańsyz dep atap, Serb Respýblıkasy aýmaǵynan shyqpaıtynyn aıtty. Ony qamaýǵa alýǵa birneshe ret áreket jasaldy.

Joǵarǵy sot Dodıktiń úkimin ózgerissiz qaldyrdy. Alaıda Dodık otstavkaǵa ketpeýge jáne jańa saılaýǵa qarsy shara qoldanýǵa ýáde berdi.

Dodık 2010 jyldan beri Serb Respýblıkasy prezıdenti qyzmetin úsh merzimge atqardy jáne 2018 jyldan 2022 jylǵa deıin Bosnııa jáne Gertsegovına Prezıdıýmynyń múshesi boldy.

Bosnııa jáne Gertsegovına Prezıdıýmy – alqaly basqarý organy bolyp, ol bosnıalyq, horvat jáne serbterdiń ókilderi sanalatyn úsh adamnan turady.

Serb Respýblıkasy — Bosnııa jáne Gertsegovına quramyndaǵy ákimshilik-aýmaqtyq birlik. Ol 1992 jyly táýelsiz memleket bolyp jarııalandy, biraq 1995 jylǵy Deıton beıbitshilik kelisiminiń nátıjesinde Bosnııa jáne Gertsegovınanyń bir bóligi retinde tanyldy.

Eske sala keteıik, Bosnııa men Gertsegovına tóraǵasy dıplomatııalyq qatynastar tujyrymdamasyn qaıta qaraýdy usynǵan bolatyn.