Mıllıonǵa jýyq Chrysler, Jeep, Dodge jáne Ram kólikteri keri qaıtarylady
ASTANA. KAZINFORM – Stellantis kontserni kóliktiń artqy kórinisin qamtamasyz etetin beınekamerasyndaǵy aqaýǵa baılanysty Chrysler, Dodge, Jeep jáne Ram markalarynyń shamamen 955 myń kóligin keri qaıtaryp jatyr, dep habarlaıdy Euronews.
Másele mýltımedıalyq júıeniń baǵdarlamalyq jasaqtamasyndaǵy aqaýǵa baılanysty. Ol kólik artqa qozǵalǵan kezde kameradan túsetin beıneniń ekranda durys kórsetilýine kedergi keltirýi múmkin.
Keri qaıtarý naýqany AQSh-ta shamamen 848 myń, Kanadada 83 myń, Meksıkada 8 myń jáne Soltústik Amerıkadan tys naryqtarda taǵy 15 myńǵa jýyq kólikti qamtıdy.
Olardyń arasynda 2026 jáne 2027 modeldik jyldardaǵy Chrysler Pacifica, Pacifica Plug-in Hybrid jáne Voyager, Dodge Charger, Jeep Cherokee, Compass, Gladiator, Grand Cherokee, Grand Wagoneer jáne Wrangler, sondaı-aq Ram modelderi bar.
Stellantis aqaýdy baǵdarlamalyq jasaqtamany qashyqtan jańartý (over-the-air) arqyly joıýdy josparlap otyr. Kompanııanyń málimetinshe, ázirge osy aqaýǵa baılanysty jol-kólik oqıǵalary nemese zardap shekkender týraly aqparat túspegen.
Bul Stellantis kólikterindegi artqy kórinis kamerasyna qatysty alǵashqy jaǵdaı emes. 2024 jylǵy maýsymda kontsern Soltústik Amerıkada osyǵan uqsas baǵdarlamalyq aqaýǵa baılanysty shamamen 1,16 mln kóligin keri qaıtarǵan edi. Onyń 1,03 mıllıony AQSh-ta, taǵy 126 myńy Kanadada tirkelgen.
Ol kezde de Dodge Durango, Chrysler Pacifica, Jeep Grand Cherokee, Ram jáne Wagoneer sekildi modelder qamtylyp, másele baǵdarlamalyq jasaqtamany jańartý arqyly sheshilgen.
Kompanııanyń sońǵy esebine sáıkes, 2025 jyly Stellantis shamamen 13,4 mln kóligin túrli aqaýlarǵa baılanysty keri qaıtarǵan. Salystyrmaly túrde, 2024 jyly bul kórsetkish 7,3 mln kólik bolǵan.
Aıta keteıik, bıyl Kia órt shyǵý qaýpine baılanysty 460 myńnan astam kóligin AQSh-qa qaıtarǵanyn jazdyq.
Al Ford 255 myńnan astam Focus kóligin keri qaıtarýǵa májbúr bolyp otyrǵanyn jazǵan edik.
Sondaı-aq bıyl aqpan aıynda Chrysler tirkemedegi aqaýlarǵa baılanysty kólikterin keri qaıtaryp jatqany habarlandy.
