Mıllıonǵa jetip qaldy: Pavlodarlyqtar kıik sanyn retteý sharalaryn engizý qajet dep otyr
PAVLODAR. KAZINFORM - Jergilikti jaýapty organdar bul usynysty QR Ekologııa mınıstrligine joldaǵan. Mamandar kıik sany mıllıonǵa jetse, olardy baqylaý qıynǵa soǵatynyn eskertti.
Pavlodar oblysy jer qoınaýyn paıdalaný, qorshaǵan orta jáne tabıǵı resýrstar basqarmasynyń málimetinshe, 2023 jyly óńirde 25 myńǵa jýyq aqbóken bolǵan. Byltyrǵy esepte olardyń sany 100 myńǵa jetken. Esepke alý jumystary ár kóktemde júrgiziledi. Al 2026 jyldyń qorytyndysy boıynsha kıikterdiń qanshaǵa kóbeıgenin tek boljaý ǵana qalady. Sebebi popýlıatsııasy óte jyldam ósip kele jatyr.
- Jabaıy janýarlardyń sany kúrt ósýde. Eger retteýdi dál qazir bastamasaq, keıin jaǵdaıdy baqylaý qıynǵa soǵady. Biz Ekologııa mınıstrligine Batys Qazaqstan oblysyndaǵydaı Pavlodar óńirinde de retteý sharalaryn engizý týraly usynystar joldadyq. Retteý barysynda kıikterdi taýarly ónim, sonyń ishinde konserviler shyǵarý úshin paıdalaný usynylady. Bul jerde barlyǵy ózara baılanysty, bir máseleniń sheshilýi ekinshi jaǵdaıǵa oń áser etedi. Eger olardyń sany mıllıonǵa jetse, jaǵdaıdy baqylaý óte qıyn bolady, — deıdi Pavlodar oblysy jer qoınaýyn paıdalaný, qorshaǵan orta jáne tabıǵı resýrstar basqarmasynyń basshysy Saǵyn Tóleýtaev.
Kóbeıip ketken kıik tabyndary búginde fermerlik alqaptarǵa zııan keltirip jatyr. Maı men Baıanaýyl aýdandarynyń, sondaı-aq Aqsý men Ekibastuz aýyldyq aımaqtarynyń sharýalary kıikterdiń jaıylymdar men shabyndyqtardy taptap ketetinine jıi shaǵymdanady.
Buǵan deıin Pavlodar fermerleri kıik ólekselerinen aýrý tarap, úı janýarlaryna juǵa ma dep qaýiptenip otyrǵany týraly jazǵan edik.
