«Mıllıonǵa tatıtyn ıdeıa»: Stýdentter jańa oıyn túrin oılap taýyp, grant utyp aldy
«Age of Business» («Bıznes dáýiri») - bıznes-protsess elementterinen jáne qarjy, ekonomıka, ınvestıtsııa jónindegi vıktorınalyq suraqtardan quralǵan ústel oıyny. Ideıa avtory - Kaspıı ýnıversıtetiniń stýdenttik komandasy. Olar óz jobasyn shyndyqqa aınaldyrý úshin Tuńǵysh Prezıdent qorynyń grantyn jeńip aldy.
Jastar besinshi jyl qatarynan «Tiregi sender elimniń» stýdentter festıvali aıasynda uıymdastyrylǵan respýblıkalyq «Jas tolqyn» olımpıadasynyń gran-prıin ıelendi. Olımpıada jastardy ınnovatsııalyq ortaǵa tartýdy kózdeıtin birneshe konkýrstyq tapsyrmadan turady.
«Jas tolqynnyń» qatysýshylary jalpy bilim pánderi boıynsha suraqtarǵa jaýap berdi, stýdenttik ómir týraly rolıkter kórsetti, dene daıyndyǵy boıynsha prezıdent synaǵyn tapsyrdy jáne «Mıllıonǵa tatıtyn ıdeıa» kezeńinde ınnovatsııalyq bıznes-jobalaryn qorǵady. Sońǵy týrdaǵy basty talap - joba jańashyldyqqa toly, jastarǵa arnalǵan, al bastapqy ınvestıtsııa bir mıllıon teńgeden aspaýy kerek. 
Tuńǵysh Prezıdent qorynyń grantyn jeńip alý úshin Nur-Sultan, Almaty, Aqtóbe, Qaraǵandy jáne Pavlodardan kelgen 7 stýdenttik komanda baq synady. Stýdentterdiń ıdeıalary adam ómiriniń túrli salalaryn qamtydy. Jas qazaqstandyqtardyń ınnovatsııalyq jobalarynyń ishinde turmysy tómen otbasylarǵa kómektesetin saıt, qoqysty bólip jınaý júıesi, durys tamaqtaný býfeti, sýdy jáne elektr qýatyn generatsııalaıtyn qurylǵy jáne sondaı-aq fıtoqabyrǵa boldy.
Degenmen, olımpıada qorytyndysy boıynsha ádil qazy alqasy biraýyzdan «Age of Business» ústel oıynynyń avtorlaryn jeńimpaz dep tanydy. Qalǵan 6 komanda Tuńǵysh Prezıdent qorynyń baǵaly syılyqtarymen marapattaldy.
