Mıllıonerler kún saıyn bir kıim kıedi
ASTANA. QazAqparat - Bizdiń túsinigimizde mıllıonerler tamaqtyń eń dámdisin jep, kıimniń eń sándisin kıetin adam bolyp kórinedi. Dámdisi men sándisi ǵana emes, eń kóbi de solardyń enshisinde dep oılaımyz. Alaıda, keı jaǵdaıda qatelesýimiz ábden múmkin. Baıqasańyz, Mark Tsýkerbergti feısbýk jobasyn tanystyrǵaly beri sur fýtbolkamen ǵana kóremiz. Bul onyń súıikti kıimi ǵana emes, mundaı jaǵdaıdyń ózindik sebepteri de bar, dep jazady massaget.kz.
Tsýkerbergten ózge mıllıonerler - brıtan-amerıkalyq rejıser Krıstofer Nolan da, ataqty jazýshy Elıs Gregorı de, aıtýly art-dırektor Matılda Kal de osy ádetti quptaıdy, ıaǵnı kúndelikti kıim aýystyrýdan bas tartady.
Matılda Kal
Qazir sán óndirisi qarqyndy damyp kele jatqanymen, kapsýldyq garderob kóp suranysqa ıe bolyp júr. Kapsýldyq garderob nebary 10-15 qabattalǵan nárseden quralady. Baı da baqýatty kisiler dál osy garderobty tańdaıdy. Onyń syry ne?
Qabyldaıtyn sheshimder azaıady. Tsýkerberg bylaı deıdi: «Men mıllıardtaǵan adamdarǵa qyzmet etip, jaqsylyq jasaý úshin oıanatynymdy baqytyma balaımyn. Ózim qabyldaıtyn sheshimder ishinde qoǵamǵa qatysy joq nárselerdi meılinshe qysqartqym keledi. Al ne kıetinim jóninde oılanýǵa ýaqyt qurtsam, óz isimdi tolyq atqara almaı qalatyndaımyn».
Artyq oıdan arylamyz. Aına aldynda turyp "Bul tym resmı emes pe?", "Al mynaý ashyq-shashyq kórinedi", "Bul kıim dene músinimdi buzyp turady eken", "Mynaý bolsa asa saltanatty keshterge arnalǵandaı", "Al munymen qandaı sómke ustaımyn?" dep kúbirleý bárimizge tanys bolar. Osynsha artyq máselemen qoshtasatyn kún jetti.
Ýaqyt únemdeımiz. Kún saıyn tańerteń turǵanda ne uıqyǵa jatar aldynda ne kıerimizdi bilmeı dal bolamyz. Biraz ýaqyttan beri kıilmegen kóp kıimniń birin tańdaýǵa, ony basqasymen úılestirýge jiberetin ýaqytyńyzdy esepteńiz. Birin sheship, birin kıip, bir sheshimge keldim-aý degende, oǵan jańadan kıetin kıimińizdi útikteýge ketetin ýaqytty qosyńyz. Osylaı júrgende jumysqa ne kezdesýge keshikpesińizge kim kepil?
Krıstofer Nolan
Ádette, kıimi kóp kisi "Ne kısem eken?" degen suraqpen jıi bas qatyrady. Al kıim kóp bolǵan saıyn, kútim de kóbeıip, árqaısysyn jýyp-tazalaý, útiktep, jınaý úshin qýatyńyz shyǵyndalady. Jetistikke jetkisi keletin jan qýaty men ýaqytyn mundaı isterge arnamaıdy.
Artyq aqsha jumsamaımyz. Kıim jınaıtyn sóreńizge kóz salyńyzshy. Ol jerden, mindetti túrde eshqashan ústińizge ilmegen kıim de tabylady. Olar, tipti birnesheý bolýy da múmkin. Endi kórseqyzarlyqpen alynǵan, paıdalanylmaǵan buıymdarǵa jibergen aqshańyzdy eseptep kórińiz. Mundaı kıimderdi jaqyndaryńyzǵa berip, ne odan ózge buıym jasap qutylyńyz. Kıim teksheńizde tek yńǵaıly da jıi kıetin kıimderge oryn berińiz.
Mıllıonerler joǵarydaǵy jaıttardy eskere otyryp, kóp aqshaǵa birneshe sapasyz buıym alǵanǵan qaraǵanda, bir sapaly kıim alyp, sony únemi kıip júrýdi qoldaıdy. Al siz qaı nusqany tańdaısyz?
