Mıllıondar bólingenimen, masa azaımaı tur: Atyraýda turǵyndardyń shaǵymy kóbeıdi
ATYRAÝ. KAZINFORM — Atyraýlyqtar bıyl masaǵa qarsy kúreske 172 mln teńgeden astam qarjy bólingenine qaramastan, júrgizilip jatqan dezınsektsııa nátıjesine kóńili tolmaıtynyn aıtyp otyr. Qala turǵyndarynyń sózinshe, sońǵy kúnderi masa kóbeıip, keshke kóshede júrý qıynǵa soqqan.
Atyraý qalasynyń turǵyndary áleýmettik jelide masa ýlaý jumysynyń tıimdiligine qatysty shaǵymdaryn jıiletti. Olardyń pikirinshe, qomaqty qarjy bólingenimen, zııankester sany azaımaı otyr. Turǵyndar dezınsektsııa júrgizilip jatqan aýmaqtar men paıdalanylǵan tehnıkalar týraly turaqty túrde esep jarııalaýdy suraıdy.
— Qaladaǵy ár aýdan men kóshelerde júrgizilip jatqan dezınsektsııalyq jumysty kúsheıtip, paıdalanylǵan tehnıkalar men atqarylǵan jumystar týraly beıne esepterdi turaqty túrde jarııalap otyrýdy suraımyz. Mysaly, qaı aýmaqta qandaı jumystar júrgizilgeni kórsetilip, sol aýmaq turǵyndarynyń pikirleri de eskerilse, atqarylǵan jumystyń nátıjesi halyqqa ashyq ári túsinikti bolar edi, — deıdi atyraýlyqtar.
109 biryńǵaı baılanys ortalyǵyna sáýir aıynan beri masaǵa qatysty 815 ótinish túsken. Onyń 796-sy oryndalǵan.
Qala boıynsha dezınsektsııaǵa «AG Disinfection Services» JShS jaýapty. Merdiger mekemeniń málimetine sáıkes, masa ýlaý kún saıyn keshki saǵat 22:00–den tańǵy 06:00–ge deıin júrgiziledi. Qazir jumystar kúsheıtilgen rejımde uıymdastyrylyp, táýligine 3-4 reıs oryndalyp jatyr.
Mamandar sońǵy kúnderi masanyń kóbeıýin jaýyn-shashynnyń jıi jaýýymen jáne teńiz jaqtan soqqan jeldiń áserimen baılanystyrady.
— Masamen kúres úsh kezeń boıynsha júzege asady. Dezınsektsııa kezinde «Agran», «Mıstral», «Faskon», «Solfak» jáne «Tsıpermetrın» preparattary qoldanylady. Bul quraldar adam densaýlyǵy men úı janýarlaryna qaýipti emes. Barlyq eritindi arnaıy zerthanada daıyndalyp, tıisti tekserýden ótedi, — dedi merdiger mekemeniń ókili Gúlsara Hodjebekova.
Erik-Mostovoı kanaly men «Sasyq saı» býlaný alańy masanyń negizgi kóbeıý oshaqtarynyń biri sanalady. Osyǵan baılanysty atalǵan aýmaqtardy ýlaýǵa dron jumyldyrylǵan. Bul qural arqyly shashylatyn eritindi 300 metr radıýsqa taralyp, áser etý aýmaǵy 2 shaqyrymǵa deıin jetedi. Mundaı jumystar masanyń kóbeıý deńgeıine qaraı aptasyna bir-eki ret atqarylady.
— Budan bólek, kópqabatty turǵyn úılerdiń jertóleleri men kireberisteri, sý aıdyndary men ylǵaldy aýmaqtar da zalalsyzdandyrylyp jatyr. Jumystar jaz boıy jalǵasady, — dedi Atyraý qalalyq turǵyn úı-kommýnaldyq sharýashylyǵy jáne turǵyn úı ınspektsııasy bóliminiń bas mamany Eldar Qarıpollaev.
Aıta keteıik, bıyl Atyraý qalasynyń oń jáne sol jaǵalaýyndaǵy yqshamaýdandarda masaǵa qarsy kúres júrgizýge jergilikti bıýdjetten 172 mln teńgeden astam qarjy bólingen. Buǵan deıin Atyraýda masa ýlaý jumystaryna alǵash ret dron paıdalanylatynyn jazǵan edik.
