Mıllıondaǵan sırııalyqtyń nazary Astanaǵa aýyp tur - Sergeı Lavrov

ASTANA. QazAqparat - Mıllıondaǵan sırııalyqtyń nazary Astanaǵa aýyp tur. Bul týraly búgin elordada bastalǵan Sırııadaǵy ahýaldy retteý jónindegi Astana protsesiniń  kepilger elderi Syrtqy ister mınıstrleriniń kezdesýinde Reseıdiń SІM basshysy Sergeı Lavrov aıtty, dep habarlaıdy QazAqparat.

«Astana protsesi bastalǵannan beri Astana halyqaralyq kún tártiptegi eń ótkir máselelerdiń biri - Sırııa  máselesin retteý boıynsha sheshim qabyldanatyn mańyzdy alańǵa aınaldy. Eger úlken ekpin qoıa aıtar bolsaq, BAQ Qazaqstan elordasynyń ataýyn aıtqan kezde mıllıondaǵan sırııalyq Astana jaqqa úmitpen qaraıdy», - dedi Reseı Syrtqy ister mınıstri.

Osy rette ol Reseı, Iran jáne Túrkııanyń  osydan bir jyl buryn qurǵan Astana formaty óziniń qajettiligin kórsetip otyrǵanyn aıtty.

«Іs júzinde deeskalatsııa aımaǵy jumys istep tur, gýmanıtarlyq mınasyzdandyrý ustanymy ázirlendi. Qolǵa túsken tutqyndardy bosatý jónindegi jumys toby qurylyp, keshe olar osy jerde ónimdi keńes ótkizdi.  Árıne, biz de belgili bir deńgeıde gýmanıtarlyq kómek jetkizýdi jeńildetip, BUU qamqorlyǵyndaǵy 2254 qarar negizinde tolyqqandy saıası protsesti jańǵyrtý úshin jaǵdaı jasadyq», - dedi Sergeı Lavrov.