Mıllıondaǵan sırııalyq eldi tastap shyqqan
ASTANA. 7 naýryz. QazAqparat - Eldegi rejım men oppozıtsııa arasyndaǵy eki jylǵa sozylǵan qarýly qaqtyǵystan shekara asqan sırııalyqtardyń sany 1 mıllıonǵa jetti. Bul málimetti BUU-nyń bosqyndar isi jónindegi joǵarǵy komıssar basqarmasy keltirip otyr.
muslim.kz saıtynyńy jazýynsha, azamattyq soǵys órti sharpyǵan elden bas saýǵalap qashqandardyń jartysyna jýyǵy - balalar. Olardyń kóbisi áli 11-ge tolmaǵan jetkinshekter.
Birneshe mıllıondaǵan adam úı-jaıynan aırylǵan. «Biz qoldan kelgenshe kómektesýge tyrysyp jatyrmyz. Alaıda, halyqaralyq gýmanıtarlyq kómekke jarymaı otyrmyz. Bul qasiretti qaıtken kúnde de toqtatý kerek», - dedi BUU-nyń atalmysh basqarmasynyń bastyǵy Antonıo Gýterres. Sondaı-aq, ol Sırııadaǵy jaǵdaıdyń «jarylýǵa shaq turǵanyn» jetkizdi.
Atalǵan vedomstvonyń esebinshe, bosqyndar sany 2013 jyldyń basynan beri óse túskeni baıqalǵan. Qańtardyń 1-nen bastap 400 myńdaı adam eldi tastap shyqqan. Buǵan qosa, agenttik ókilderi atap aıtqandaı, olardyń kóbisi Lıvannan, Iordanııadan, Iraktan jáne Mysyrdan pana tapqan.
Al keıbireýleri Ońtústik Afrıka Respýblıkasy men Eýropa elderine bet alǵan.
BUU-nyń esebinshe, qarýly qaqtyǵys bastalǵan kezden beri elde 70 myńǵa jýyq beıbit turǵyn opat bolǵan.
