Mıllıondaǵan shyǵynsyz: Prezıdent mamandardy qaıta daıarlaıtyn ulttyq platforma ashýdy tapsyrdy
ASTANA. KAZINFORM — Memleket basshysy Qasym-Jomart Toqaev Úkimetke jasandy ıntellekt negizinde ázirlengen ulttyq onlaın-platformany iske qosýdy tapsyrdy. Sol arqyly jumyssyz qalǵan mamandardy bolashaqta suranysqa ıe bolatyn kásipke beıimdeý qajet.
Elordada jasandy ıntellektini damytý jónindegi keńestiń alǵashqy otyrysynda Prezıdent eńbek naryǵy kún ótken saıyn ózgerip jatqanyn atap ótti.
— Kóptegen kásip ıeleriniń jumysyn endi avtomatty júıe atqaratyn bolady. Mundaı úrdis qazirdiń ózinde júrip jatyr. Bul birqatar mamandyqtyń eskirýine, ıaǵnı kóptegen adamnyń jumyssyz qalýyna ákep soqtyrady. Bul — asa ózekti másele. Osy jumysty qazirden bastap qolǵa almasaq, mundaı úrdistiń áleýmettik saldary aýyr bolady. Jumyssyzdyq beleń alyp, turmys sapasy tómendep, áleýmettik teńsizdik kúsheıýi múmkin, — dedi ol.
Biraq bul jerde de jasandy ıntellektiniń múmkindikterin tıimdi paıdalanýǵa bolady. Máselen, aqyldy tehnologııalar qyzmetkerlerdiń myqty ne álsiz tustaryn aıqyndap, kásibı sheberligin damytý úshin naqty usynystar bere alady.
— Mamandardy qaıta daıarlaýǵa jáne biliktiligin arttyrýǵa keń múmkindik jasap, kúni buryn áreket etýge tıispiz. Bul rette tym úlken qaıta daıarlaý ortalyqtaryn qurýǵa bıýdjetten mıllıondaǵan qarjy shyǵyndaýdyń qajeti joq. Jasandy ıntellektiniń áleýetin saýatty qoldana bilgen jón. Bizdiń mindetimiz — jumyssyz qalýdyń aldynda turǵan mıllıondaǵan adamǵa jańa múmkindik berý. Basqasha aıtsaq, jasandy ıntellektiniń orasan zor áleýetin jańa jumys oryndaryn ashýǵa, adam kapıtalyn kúsheıtip, elimizdiń áleýmettik-ekonomıkalyq damýyn arttyrýǵa paıdalaný kerek. Úkimetke jasandy ıntellekt negizinde ázirlengen ulttyq onlaın-platformany iske qosýdy tapsyramyn. Sol arqyly jumyssyz qalǵan mamandardy bolashaqta suranysqa ıe bolatyn kásipke beıimdeý qajet, — dedi Qasym-Jomart Toqaev.
Qasym-Jomart Toqaev sózin qorytyndylaı kele, bizdiń tsıfrlyq strategııamyzda ult múddesi basty orynda turatynyn jetkizdi.
— Shyn máninde, negizgi másele jasandy ıntellekt qana emes. Eń bastysy — eldiń egemendigi, urpaqtyń bolashaǵy. Úkimet búgin aıtylǵan usynystyń bárin muqııat qarastyrady. Sóz sońynda bir máseleni atap ótkim keledi. Jasandy ıntellekt — tsıfrlyq ekonomıkanyń negizgi qozǵaýshy kúshi. Sondyqtan Keńestiń kelesi otyrysyn osy taqyrypqa arnaýdy usynamyn, — dedi Memleket basshysy.
Aıta keteıik, elordada Memleket basshysynyń tóraǵalyǵymen Jasandy ıntellektini damytý jónindegi keńestiń alǵashqy otyrysy ótti.
Buǵan deıin Prezıdent Qasym-Jomart Toqaev elimizde jasandy ıntellekt salasyna mamandanǵan jańa zertteý ýnıversıtetin qurýdy tapsyrǵan edi.
Sonymen birge, muǵalimder kóp ýaqytyn jumsaıtyn kúndelikti kúıbeń sharýany jasandy ıntellekt arqyly avtomattandyrýdyń mańyzyna nazar aýdardy.