«Mıllıondaǵan qarjy quıylǵan meshit qurylysy qashan bitedi?» - respýblıkalyq basylymdarǵa sholý
***
Keshe Aqordada Qazaqstan Respýblıkasynyń Prezıdenti Nursultan Nazarbaev elimizde tirkelgen sheteldik dıplomatııalyq korpýspen kezdesti jáne dıplomattar aldynda sóz sóıledi. Osyǵan oraı «Egemen Qazaqstan» gazetinde «Syrtqy saıasatymyz qashanda salıqaly» degen taqyryppen maqala basyldy. Basylymnyń atap ótýinshe, táýelsizdiktiń 20 jylynda elimiz jetken jetistikterge keńinen toqtalǵan Elbasy álemdik ahýalǵa da sholý jasaı kele: «Álemdik valıýta júıesiniń qandaı qıyndyqta ekendigi bárimizge belgili. Aldaǵy bolýy yqtımal daǵdarys budan eki jyl burynǵy jahandyq daǵdarystan da qaýipti. Biraq ekonomıkalyq qaýipsizdik máseleleri burynǵysynsha EQYU basymdyqtarynan tys qalyp otyr. EQYU-nyń áskerı ólshemderi de sýynyp barady. «Korfý úderisi» de tuıyqqa tireldi. Qazaqstan jáne basqa qatysýshy elderdiń Uıym aıasynda qaýipsizdik sebetin keńeıtý týraly usynysy da ázirge júzege aspaı tur. Meniń osy ustanymymdy jáne alańdaýshylyǵymdy óz úkimetterińizge jáne halyqaralyq uıymdarǵa deıin jetkizedi dep úmittenemin», - dedi.
Keshe Qazaqstan Respýblıkasy Premer-Mınıstriniń orynbasary Qaırat Kelimbetov bastaǵan jumys toby Qaraǵandy oblysynda bolyp, Elbasynyń bıylǵy Joldaýynyń oryndalý barysymen tanysý jáne turǵyndarǵa túsindirý maqsatynda eńbek ujymdarymen kezdesýler ótkizdi.Top músheleri Qaraǵandy, Temirtaý qalalarynda byltyr boı kótergen áleýmettik-sporttyq nysandardy, mektepter men balalar baqshalaryn aralap kórýmen birge, údemeli ındýstrııalyq-ınnovatsııalyq damý baǵdarlamasyn iske asyryp jatqan kásiporyndardyń eńbek tynysymen tanysty. Bul jaıynda tolyǵyraq «Egemen Qazaqstan» gazetiniń senbilik sanyndaǵy «Jaýapkershilik júgi joǵary» degen taqyryptaǵy maqaladan bile alasyzdar.
***
«Alash aınasy» gazetinde «Mıllıondaǵan qarjy quıylǵan meshit qurylysy qashan bitedi?» degen taqyryppen maqala basyldy. Basylymnyń atap ótýinshe, bul saýal kókshetaýlyqtardyń kókeıin tolǵandyryp júrgenine birshama ýaqyt ótken. Óıtkeni birneshe jyldyń júzi bolsa da aqmolalyq musylmandar úshin aq túıeniń qarny jarylar emes. Túbi besik qorǵa qansha qarajat quıyp, tipti jurttan jylý jınap, sheteldik ınvestorlarǵa deıin alaqan jaısaq ta, Allanyń jerdegi úıiniń aıaqtalar túri joq. Dál qazir qurylys qarqyn alýǵa tıis bolǵanymen, ázirshe meshit basynda múlgigen tynyshtyq. Sebep tek bireý: Meshit qurylysyna bólingen qarjat qory taýsylǵan. Tolyǵyraq - basylymnyń búgingi sanynda.
***
«Aıqyn» gazetiniń búgingi sanynda tehnıka ǵylymdarynyń doktory, Q.Sátbaev atyndaǵy QazUTÝ professory, Ulttyq ınjenerlik akademııanyń akademıgi Júzbaı Qasymbekovpen aradaǵy suhbat «Ǵylymı jańalyqtardy óndiriske engizýmen aınalysatyn menedjerlerdi kóbeıtý kerek» degen taqyryppen berildi. Basylym tilshisiniń barlyq saýaldaryna tuşymdy jaýap bergen ǵalym: «Jurttyń bári, onyń ishinde ózim de barmyn, granttyq baıqaýlarǵa qatysýǵa qumarmyz, sol úshin talasamyz. Óıtkeni ol qaıtarymy joq tegin aqsha ispetti. Al ozyq elderdiń kóbinde olaı emes qoı. Eger tapsyrmada kórsetilgen nátıje alynbasa, onda olar tıisti somada aıyppul tóleıdi nemese alǵan aqshany ústeme paıyzben qaıtarady. Ondaı jaǵdaıda, baıqaýǵa tek ózine-ózi sengender ǵana qatysady, tabıǵı irikteý oryn alady", - deıdi.
***
«Kazahstanskaıa pravda» gazetiniń jazýynsha, Premer-Mınıstrdiń birinshi orynbasary Serik Ahmetov Memleket basshysynyń tapsyrmasyna oraı Ońtústik Qazaqstan oblysyna jumys saparymen keldi. Ońtústikke taban tiregen ol sý tasqyny qaýpi tónýine baılanysty apat aýqymyn baǵalaý, sý basqan aýyldardyń turǵyndarymen kezdesý, shuǵyl áreket etý qyzmetteriniń is-qımyldaryna jetekshilik etý syndy jumystarǵa basshylyq jasamaq. «Oblystyq tótenshe jaǵdaılar departamentiniń málimetteri boıynsha 969 aýla, onyń ishinde 428 turǵyn úı sý astynda qalǵan. Qaıǵyly oqıǵalardan qashý úshin 418 otbasy qaýipsiz aýmaqqa kóshirilgen. Jalpy shamamen 2,5 myń adam baspanalaryn tastap shyqty», - dep jazady basylym.
