Mıllıondaǵan qarjy bólingen mektep-ınternattyń jóndeý jumystary nege toqtap tur
QONAEV. KAZINFORM — Almaty qalasynda ornalasqan Ibrash Núsipbaev atyndaǵy mektep-ınternat jataqhanasynyń jóndeý jumystary birneshe jylǵa sozylyp ketti. Onyń naqty sebebin Kazinform tilshisi anyqtap kórdi.
Alyp shahardyń ortalyǵynda ornalasqan I. Núsipbaev atyndaǵy mektep-ınternat Almaty oblysynyń bilim basqarmasyna qaraıdy.
Vedomstvodan málim etkendeı, 2022 jyly bastalǵan qaıta jóndeý jumystary jaýapsyz merdigerdiń kesirinen toqtap qalǵan.
— Ibrash Núsipbaev atyndaǵy mektep-ınternattyń jatyn korpýsynyń kúrdeli jóndeý jumysy merziminiń sozylyp ketýine merdiger «Gradstroıservıs» jaýapkershiligi shekteýli seriktestiginiń óz mindetterin ýaqtyly oryndamaýy sebep bolyp otyrn. Osyǵan baılanysty sot protsesteri áli bolyp jatyr, — delingen agenttiktiń resmı saýalyna bergen vedomstvo jaýabynda.
Basqarmadan atap ótkendeı, jataqhananyń kúrdeli jóndeý jumystaryna oblystyq bıýdjetten 572,6 mln teńge bólingen.
Merdigerge avans retinde 150 mln teńge jáne atqarylǵan jumys úshin 87,8 mln teńge tólendi.
«Gradstroı servıs» kompanııasy sottyń qaýlysymen memlekettik satyp alýdyń josyqsyz qatysýshy dep tanyldy.
— Budan bólek, Qarasaı aýdandyq bilim bólimi merdigerdiń 113 mln teńgeni bıýdjetke qaıtaryp berýi týraly sotqa shaǵym túsirdi. Alaıda sot aryzdy qarastyryp, qaraýsyz qaldyrý týraly uıǵarym shyǵardy, — delingen jaýapta.
Osyǵan baılanysty Qarasaı aýdandyq bilim bólimi oblystyq prokýratýraǵa, Sybaılas jemqorlyqqa qarsy is-qımyl departamentine shaǵym joldady.
— Atalǵan mekemeler tek sot sheshimine júginý qajettigi týraly jaýap joldady, — deıdi basqarma ókilderi.
Aıta keteıik, qazir ınternatta 174 bala oqıdy. Mekteptiń jobalyq qýaty 320 orynǵa arnalǵan.
— Jatyn korpýsy jeke turǵan ǵımarat, onda qaýipsizdik sharasy qarastyrylǵan. Jóndeý jumystary kezinde oqýshylar oqý korpýsynyń ekinshi qabatyna ornalastyryldy, — dep atap ótti vedomstvodan.
Mektep-ınternattyń oqý korpýsyna kúrdeli jóndeý jumystary 2011 jyly jasaldy.
Buǵan deıin Almaty oblysynyń № 1 balalar úıi Almatydan Qonaev qalasyna kóshiriletinin jazǵanbyz.
Keıin Qazaqstandaǵy bala quqyqtary jónindegi ýákil Dınara Zakıeva balalar úıi tárbıelenýshileriniń kóshýine pikir bildirgen edi.