Mıllıondaǵan Hyundai men Kia kólikteri keri qaıtarylýda
ASTANA. QazAqparat - Mıllıondaǵan Hyundai men Kia kólikteri óndirýshi-zaýytqa keri qaıtarylýda, dep habarlaıdy QazAqparat Reuters agenttigine silteme jasap.
Ońtústikkoreıalyq eki avtokompanııanyń sedandary men krossoverleriniń qozǵaltqyshtarynan aqaýlar tabyldy. 1,5 mıllıon Hyundai Sonata, Santa Fe, Kia Optima, Sorento jáne Sportage markaly jeńil kólikter keri qaıtarylady.
Ońtústik Koreıanyń kólik mınıstrliginen málim etkendeı, ıindibilik pen moıyntirekti óndirý barysynda jiberilgen qatelikter saldarynan qozǵaltqyshtar óship qalyp, isten shyǵýy múmkin.
Bul avtolardyń kóp bóligi AQSh-ta satylǵan. Amerıkadan aqaýdy túzetý úshin 1,3 mln mashına keri qaıtarylady. Ońtústik Koreıada aqaýy bar kólikter sany 171,3 myń avtony quraıdy.
Eske salaıyq , 2016 jyldyń qazan aıynda qaýipsizdik jastyqshalaryndaǵy kemshilikter 6 mln Toyota kóliginiń keri qaıtarylýyna sebep boldy.
