Mıllıondaǵan adamnyń ysyrapshyldyǵy búkil eldiń baılyǵyn jelge ushyrady – Prezıdent

ASTANA. KAZINFORM – Mıllıondaǵan adamnyń ysyrapshyldyǵy búkil eldiń baılyǵyn jelge ushyrady. Bul týraly Ulttyq quryltaıdyń úshinshi otyrysynda sóılegen sózinde Prezıdent Qasym-Jomart Toqaev málim etti.

«Kelesi túıtkil – ysyrapshyldyq. Shyn máninde, yrystyń bastaýy – únemshildik. Damyǵan elderde jaryq pen sýǵa deıin únemdep paıdalaný joǵary deńgeıdegi qoǵamdyq mádenıetke aınalǵan. Al bizde buǵan múlde kereǵar jaǵdaı qalyptasqan. Mıllıondaǵan adamnyń ysyrapshyldyǵy búkil eldiń baılyǵyn jelge ushyrady. Mysaly, sý máselesi. Bizde sýdy únemdeýge baılanysty qalyptasqan dástúr joq. Ony ashyq moıyndaýymyz kerek. Al sý bolashaqtyń baılyǵy ekenin búkil álem moıyndaıdy. Bul – Qazaqstan úshin asa mańyzdy másele. Sebebi elimizde sý tapshylyǵy paıda boldy. Bizde materıaldyq qana emes, rýhanı ysyrapshyldyq ta bar. Ózińdi, elińdi damytýǵa qajetti qanshama altyn ýaqyt ónbeıtin daý-damaıǵa, esh paıdasy joq iske jumsalyp jatyr. Árqaısymyz únemshil ári uqypty bolsaq, elimizdiń berekesi arta túser edi. Urpaqtyń sanasyna osyny sińire berýimiz qajet. Osy derttiń bárinen túbegeıli arylsaq, ultymyzdyń sapasyn jaqsartamyz, ony múlde jańa deńgeıge kóteremiz»,-dedi Memleket basshysy.

Sondaı-aq Prezıdent sózinde qoǵamǵa qaýipti keseldermen kúresýge zııaly qaýym, aqparat quraldary, úkimettik emes uıymdar, barlyǵy bir kisideı jumylýy kerektigin eskertti.

«Muny árbir azamattyń jáne búkil qoǵamnyń mindeti dep túsiný qajet. Sebebi bul – ulttyń bolashaǵyna tikeleı qatysy bar másele», -dedi ol.