Mıllıondaǵan adam jeke kásipkerlikti «kerek bolyp qalar» dep ashyp qoıǵan - mınıstrlik

NUR-SULTAN. QazAqparat - Elimizde mıllıondaǵan adam jeke kásipkerlikti «kerek bolyp qalar» dep jaı ashyp qoıǵan. Bul týraly búgin Ortalyq kommýnıkatsııalar qyzmetindegi brıfıngte QR Eńbek jáne halyqty áleýmettik qorǵaý mınıstri Birjan Nurymbetov aıtty, dep habarlaıdy QazAqparat tilshisi.

«Myńdaǵan, mıllıondaǵan adam jeke kásipkerlikti «kerek bolyp qalar» dep jaı ashyp qoıǵan. Olar jumys istep jatqan joq. Endi sol jeke kásipkerliktiń atynan ótinish bereıin dese, sońǵy 12 aıda eshteńe tólenbegen, ótpeıdi. Sodan biryńǵaı jıyntyq tólem tóleı salaıyn deıdi. Ol da ótpeıdi. Sebebi biryńǵaı jıyntyq tólem qarapaıymdatylǵan salyq rejımi sanalady», - dedi ol.

Mınıstrdiń aıtýynsha, jeke kásipkerligin tirkegen adamdarǵa 42 500 teńge mólsherinde áleýmettik tólem alýǵa quqyǵy bar ekendigi týraly habarlamalar jiberilgen.

«Basynda jeke kásipkerlerdiń barlyǵynan ótinish almaı tóleı salsaq dep oılaǵan edik. Biraq, anyqtaý úshin sms-habarlama jiberdik. Sodan anyqtalǵany, jeke kásipkerlikti jaı ǵana ashyp qoıǵandar bar eken. Olardyń ekinshi jumysy bar. Keıbireýleri áleýmettik jelide «myna kisiler jumysym bar ekendigin bilmeıdi eken» dep keketip jazǵandary da bar. Solardyń barlyǵyn saralaı kele, jeke kásipkerler ózderi ótinish bermese, tólemeımiz dep sheshtik. Jeke kásipkerligi bar azamattar, mindetti túrde ótinish beresizder», - dedi Birjan Nurymbetov.