Mıllıon oqyrmany bar qytaılyq eks-sheneýnik isti boldy

ASTANA. KAZINFORM – 2013-2016 jyldar aralyǵynda qazaq oblysyn basqarǵan qytaılyq joǵary laýazymdy eks-sheneýnik tergeýge alyndy. Ol kezinde mıllıonnan astam oqyrmany bar ınternet-bloger retinde tanymal bolǵan edi.

Миллион оқырманы бар қытайлық экс-шенеунік істі болды
Фото: freepik.com

Qytaılyq BAQ-tyń jarysa jazýynsha, QKP Shyńjań uıǵyr avtonomııalyq regıondyq Tártiptik tekseris komıssııasy 2 sáýir kúni ShUAR Halyq úkimeti partııalyq basshylyq tobynyń burynǵy múshesi Hýan Sanpınniń ústinen zań men tártipti óreskel buzǵany úshin tártiptik is qozǵalǵanyn habarlady.

Ashyq derekkózden belgili bolǵandaı, 68 jastaǵy Hýan Sanpın uzaq jyldar boıy Shyńjańda basshylyq qyzmet atqaryp, buryn-sońdy Buratala mońǵol avtonomııalyq oblysy ákiminiń orynbasary, Qumyl aımaqtyq partııa komıteti hatshysynyń orynbasary, Qashqar aımaqtyq partııa komıteti hatshysynyń birinshi orynbasary, Aqsý aımaqtyq partııa komıtetiniń hatshysy, Іle Qazaq avtonomııalyq oblystyq partııa komıtetiniń hatshysy bolǵan. 2016 jyldyń jeltoqsan aıynda Shyńjań Halyq úkimeti partııalyq basshylyq tobynyń múshesi bolyp taǵaıyndalyp, keıinirek jergilikti Halyq ókilderi jınalysynyń turaqty komıtetine jylystatylǵan.

Hýan Sanpın zeınetke shyqqannan keıin de qoǵamdyq is-sharalarǵa jıi qatysyp otyrǵan. 2023 jyldyń sáýirinde ol Shyńjań qarttar isin damytý qorynyń tóraǵasy bolyp saılanǵan.

Saıası saraptamalarymen tanymal guancha.cn saıtynyń jazýynsha, Qytaı sheneýnikteriniń kópshiligi jurt nazaryna ilinýden boıyn aýlaq ustaıtyny belgili, biraq, Hýan Sanpın, kerisinshe, áleýmettik jelidegi belsendiligimen kózge túsken, onyń oqyrmandarynyń uzyn sany mıllıonnan asqan bolatyn.

Aqsý aımaqtyq partııa komıtetiniń hatshysy qyzmetin atqara júrip, ol Weibo platformasynda óz atymen akkaýnt ashady. Іle oblysyna birinshi basshy bolyp barǵannan keıin de áleýmettik jeliden qol úzbeı, bes-alty jyldyń ishinde 40 myńnan astam jazba jarııalaıdy. Kezinde qytaılyq áleýmettik jeliniń kóshin bastap, keıinirek jabylyp qalǵan Tencent Weibo platformasynda onyń 1,04 mıllıon oqyrmany bolǵan, al qazirgi kúnde Sina Weibo-da áli de 420 myńnan astam oqyrmany bar.

Aıta keterligi, ótken jyly qyzmetinen bosatylyp, qylmystyq jaýapqa tartylǵan vıtse-mınıstr deńgeıindegi eki birdeı eks-sheneýnik – Doý Vangýı men ıAn Fasen óz kezinde Hýan Sanpınniń qol astynda qyzmet atqarǵan bolatyn.

ShUAR Saıası-konsýltatıvtik keńesi tóraǵasynyń burynǵy orynbasary Doý Vangýı ótken jyldyń naýryzynda isti boldy. Oǵan «saıası alaıaqtarmen baılanysqan, sımonııamen aınalysqan jáne iri kólemde para alǵan» degen aıyp taǵyldy.

Al ótken jyldyń qazan aıynda Tsınhaı provıntsııasy partııa komıtetiniń turaqty múshesi ıAn Fasen tártiptik tekseris organyna óz erkimen beriledi. Ol «arany shekten tys ashylyp, bılikti paıdakúnemdik maqsatta asyra paıdalanǵan» dep aıyptaldy.

Budan bólek, Hýan Sanpınnen keıin Іle qazaq avtonomııaly oblystyq partııa komıtetiniń hatshysy bolyp taǵaıyndalǵan Tszen Tsýn bir jylǵa jeter-jetpes ýaqytta qyzmetinen bosatylǵan. Keıinirek onyń 900 myń ıýan para alǵany belgili bolady.

Сейчас читают