Mıllıardtardy únemdeý: Startaperler elektrdi únemdeýdiń tásilin tapty

ASTANA. QazAqparat - Nazarbaev ýnıversıtetiniń túlekteri transformatordyń jumys qabiletin uzartý úshin qurylǵy jasap shyǵardy, dep habarlaıdy elorda ákimdiginiń medıa ortalyǵy. 

Joba týraly startaper komandasyndaǵy bes qatysýshynyń biri, menedjer Ádilet Záýrenbek aıtyp berdi.

«Bizdiń joba «Transfarmatordy alystan baqylaý» dep atalady. Bul júıe bult túrinde bolady jáne serverde bizdiń algorıtm jazýly turady, biz transfarmatordaǵy barlyq málimetti jınap, ony óńdeımiz. Osy málimetterdiń arqasynda transformatordyń ómirsheńdigin ulǵaıta alamyz», - deıdi Á.Záýrenbek. 

Onyń aıtýynsha, jas ǵalymdardan quralǵan toptyń oılap tapqan dúnıesi transformatordyń jumysyndaǵy problemalardy ýaqytynda anyqtap, ony alyp tastaýǵa, baqylaýǵa kómektesedi.

«Transformator - bul da der kezinde problemasyn anyqtamasań, ýaqyt óte kele tozyp synatyn mashına sııaqty. Quraldy tezirek jóndeseń, arzanǵa túsedi, jumysqa qabilettiligi de artyp, qomaqty qarjyny únemdeýge bolady», - deıdi ol jobanyń artyqshylyǵyn túsindirip. 

Transformatordyń quny júz myń dollarǵa deıin barady. Іri elektrostantsııalardyń balasynda mundaı apparattardyń kóptegen túri bar.

«Mysaly, «Astana REK» balansynda 100 myńǵa jýyq transformator bar, onyń árqaısysy 150 myń dollar turady. Eger olardyń ómirlik tsıklin 5 jylǵa uzartatyn bolsa, ol mıllıardtardy únemdeýge múmkindik beredi. Bolashaqta bizdiń júıe jasandy ıntellektke baǵyttalady», - dedi Á.Záýrenbek.

Jańa quraldy tájirıbeden ótkizip kórdi, ol avtomatty túrde synyp turǵan jerdi taýyp, habarlady.

«Tájirıbeden keıin segiz saǵat, 35 mınýttan keıin transformator kúıip ketti, ıaǵnı bizdiń tájirıbe sátti ótti», - deıdi menedjer ǵalym.

Onyń aıtýynsha, zertteý birinshi kezeńde zerthanada ótken, komandanyń endigi jospary - kádimgi transformatordy qoldanyp kórý.

Jobany jasaýǵa jastardyń bir jyldan asa ýaqyty ketken. Qurylǵyny is júzinde paıdalaný 2018 jyldyń jazyna belgilendi.