Mıllıardtar qýǵan Mıttaldan «Qarmetti» qaıtarýǵa ne kedergi – Ermurat Bapı

Májilis depýtaty Ermurat Bapı Qaraǵandy shahtasynda qaza tapqandar 40 adamǵa jetýi múmkin ekenin jazdy, dep habarlaıdy Kazinform.

«Kezinde Nursultan Nazarbaevtyń tikeleı nusqaýymen Mıttaldyń jeke menshigine berilgen «ArselorMıttal Temirtaý» kompanııasyna qarasty Kostenko shahtasyndaǵy apattan 200-den astam kenshi jer astynda qaldy degen habar keldi. Oqıǵa basynda qutqarý operatsııasymen aınalysyp júrgen jigitterdiń habaryna qaraǵanda, órttiń arǵy jaǵynda, tereń kenjarda qalǵan 30-ǵa jýyq adamdy qutqarý múmkindigi azaıǵan sııaqty», - dep jazdy depýtat áleýmettik jelidegi paraqshasynda.

Onyń aıtýynsha, Qazaqstan metallýrgııasynyń flagmany atalǵan "Qarmetkombınatty" Mıttaldyń menshiginen keri qaıtaryp alý máselesi osydan birer aı buryn – kezekti adamdar ólimine ákelgen apattan keıin qozǵalǵan edi.

«Mine, Parlament Májilisinde biraz depýtat kótergen osy talapqa Úkimet atústi qarap, «ArselorMıttal Temirtaýdy» kimge beremiz dep, yrǵalyp-jyrǵalyp júrgende kezekti apat boldy. Álıhan Smaıylov myrza (Premer-Mınıstr Á. Smaıylov – red.), tehnıka qaýipsizdigin qapersiz qaldyryp, Qaraǵandy kenshileriniń baýdaı qyrylýyna jol bergen, jeke esebine túser mıllıardtar qýyp ketken Mıttaldan "Qarmetti" qaıtaryp alýǵa ne kedergi? Siz áli kúnge deıin "eski Qazaqstan" jaqqa eleńdeýdi qoıyp, Qazaqstan halqyna qaraı qashan bas burasyz? "Amanat" partııasynyń Parlamenttegi fraktsııasy saılaýda jeńip shyqqan partııa retinde 8-shi shaqyrylymnyń alǵashqy sessııasynda "amanattyqtar" usynǵan premer-mınıstrden "Karmettiń" menshik ıesin jedel ózgertý protsessin bastaýdy talap etýdi suraımyn», - dedi E. Bapı.

Aıta keteıik, Kostenko atyndaǵy shahtada qaza tapqan kenshiler sany 20-ǵa jetti.

Memleket basshysy Úkimetke «ArselorMıttalTemirtaý» kompanııasymen ınvestıtsııalyq yntymaqtastyqty toqtatýdy tapsyrdy.