Mıllıardtar bólindi, SQO joldary shynymen jaqsardy ma
PETROPAVL. KAZINFORM - Soltústik Qazaqstan oblysynda avtomobıl joldarynyń 89% normatıvke sáıkes keledi. Bul týraly SQO jolaýshylar kóligi jáne avtomobıl joldary basqarmasynyń basshysy Erden Shortybaev málim etti.
Onyń aıtýynsha, byltyr óńirde 125 joba iske asyrylyp, jalpy uzyndyǵy 640 shaqyrym jol jóndelgen. Onyń ishinde 540 shaqyrymy — oblystyq jáne aýdandyq mańyzy bar joldar, al 100 shaqyrymy — 51 eldi mekenniń kósheleri.
Jóndeý jumystary Sergeevka, Býlaevo jáne Mamlıýtka sııaqty shaǵyn qalalardy da qamtydy. Jumystarǵa 29,6 mlrd teńge jumsaldy. Jobalardy júzege asyrýǵa 42 merdiger jáne 19 tehnıkalyq baqylaý uıymy qatysty. Jyl sońynda 66 joba tolyq aıaqtalǵan.
Bıyl jóndeý sapasyna erekshe nazar aýdarylady. Merdigerlerdiń jaýapkershiligi kúsheıtilip, kepildik talaptary qatańdatylady.
— Bıyl joldardy jóndeýge 20 mlrd teńge bólindi. Bul qarajatqa 300 shaqyrym jergilikti mańyzy bar avtomobıl joldary men eldi meken kósheleri jóndelmek, — dedi Erden Shortybaev.
Qazirgi ýaqytta SQO joldarynda avtomattandyrylǵan ólsheý stantsııasy jumys istep tur. Bıyl mundaı stantsııalar Esil aýdanyndaǵy Pokrovka, Maltsevo, Aqqaıyń aýdanyndaǵy Smırnovo jáne Aıyrtaý aýdanyndaǵy Shalqar mańynda ornatylady. Bul — jol sapasyn saqtaýǵa baǵyttalǵan shara.
Ótken jyly «Jol aktıvteri sapasynyń ulttyq ortalyǵy» oblystyq fılıaly 156 tekseris júrgizip, 913 synama aldy. Nátıjesinde 16 myń sharshy metr jol qaıta tóseldi. Sonymen qatar 104 shaqyrym jol tekserilip, málimetter eJoldar tsıfrlyq júıesine engizildi. Bıyl bul jumystar jalǵaspaq.
Buǵan deıin Qazaqstanda avtojoldar salasyndaǵy normatıvti-tehnıkalyq qujattar jańartylyp jatqanyn jazǵan edik.
