Mıllıardtar alyp úırengen sporttyq klýbtardyń tábetin tejeý kerek – Májilis depýtaty

ASTANA. KAZINFORM – Májilis depýtaty Nartaı Sársenǵalıev otandyq sportty damytýǵa bólinetin qyrýar qarjyǵa alańdatýshylyq tanytyp, ashyq esep júrgizýdi talap etti. Sonymen qatar halyq qalaýlysy Qazaqstan sportyn synǵa aldy.

- Sońǵy 6 jylda Qazaqstanda sport salasyn qarjylandyrýǵa shamamen 1,4 trıllıon teńge jumsaldy. Bıyl jáne aldaǵy eki jylda bıýdjetten taǵy 1,3 trıllıon teńge bólý josparlanǵan. Basqasyna bas qatyrmasa da Qazaqstan kásibı sportqa aqsha quıýdan aldyna qara salmaı tur, Ortalyq Azııa elderin ozǵany azdaı, Kanada, Norvegııa, Nıderlandy da bizge jete alar emes. Biraq álemdik sport reıtınginde Qazaqstan 2014 jyly 25-orynda bolsa, 2023 jyly 42-orynǵa túsip qaldy. Munyń basty bir sebebi, sport túrleriniń saralanbaýy. Máselen, joǵary jetistikter sporty retinde qarjylandyrylatyn baǵyttardyń 60%-y Olımpıadalyq emes. Biraq olar bıýdjetten aýqymdy aqsha alyp keledi, - dep Nartaı Sársenǵalıev Úkimet basshysynyń atyna depýtattyq saýal joldady. 

Osy oraıda halyq qalaýlysy Májiliste qaralyp jatqan «Sport týraly» zań jobasynda atalǵan olqylyqty toqtatý úshin naqty ózgerister engiziletinin aıtty.

- Bıýdjettiń búıirin tespeı soryp úırengender aqparattyq shabýylǵa kóship, memleket sportqa aqsha bólýdi toqtatyp salany turalatyp tastamaq degen jalǵan aıyptaýlar taratýmen álek. Biz tek jemsaýdy toltyrýdy bilgenmen sportta ilip alar jetistigi joq salalarǵa búginge deıin bólinip kelgen esepsiz aqshanyń jolyn kesýdi maqsat tuttyq. Máselen sońǵy 6 jylda 49 mlrd teńge alǵan «Barys» hokkeı klýby, sońǵy 6 jylda 50 mlrd teńge alǵan «Astana» fýtbol klýby syndy komandalardyń ár tıyn úshin esep beretin kúni týýy tıis. Osynsha aqsha alǵanyna qaramastan atalǵan komandalardyń óz ınfraqurylymdary joq, salmaǵan. Bir ǵana «Astana» fýtbol klýby alty jyl ishinde tek fýtbol alańdary men ǵımarattardy jalǵa alýǵa 1,4 mlrd teńge jumsaǵan, - deıdi ol.

Onyń aıtýynsha, keı sporttyq ujymdar jaýapkershilikten sytylý úshin qarjyny bıýdjetten emes, kvazımemlekettik sektordan aldyq dep aqtalady.

- Sportqa bólinetin qarajatty shekteý týraly sheshimniń durys ekenin, al búgin baıbalam salǵandardyń túpki múddesi ne ekenin anyq ańǵarýǵa bolady. Osynsha aqshanyń biraz bóligi legıonerlerdi ustaýǵa jumsalatyny Sybaılas jemqorlyqqa qarsy is-qımyl agenttigi málimdedi. Muny toqtatý úshin Májiliste Qazaqstan Respýblıkasynyń azamaty bolyp tabylmaıtyn sportshylardy memlekettik bıýdjet esebinen de, kvazımemlekettik bıýdjet esebinen de qarjylandyrýǵa tyıym salynady degen norma qabyldandy. Mıllıardtar alyp úırengen klýbtardyń tábetin tejeý kerek. Sheteldik sportshyny ákelýden bólek, olarǵa azamattyq berý isi de elde beleń aldy. Táýelsizdik alǵannan beri Qazaqstan 126 sheteldik sportshyǵa azamattyq bergen, biraq olardyń árbir ekinshisi keıin óz eline qaıtyp ketken. Bul máseleni Memleket basshysy da qatań synǵa aldy, - dep tolyqtyrdy N. Sársenǵalıev.

Osy tusta, Májilis depýtaty Týrızm jáne sport mınıstrligi zań jobasyna qatysty túsindirý jumystaryn kóbeıtýi qajettigin basa aıtty. Sondaı-aq sport federatsııalarynyń aqparattyq jumysqa qansha qarjy jumsaıtynyn tekserý kerektigin eske saldy.

Osyǵan deıin Májilis rezervtegi áskerı qyzmetke qatysty zańdy qabyldaǵany týraly jazǵan edik.