Mıllıardtaǵan teńgeni urlaǵan taldyqorǵandyq esepshiniń isine Antıkor aralasty

TALDYQORǴAN. QazAqparat - Sybaılas jemqorlyqqa qarsy qyzmet Jetisý oblysynyń prokýratýrasynyń úılestirýimen Taldyqorǵan qalasynyń bilim bóliminiń qyzmetkerlerin ustady, dep habarlaıdy QazAqparat.

Atalǵan azamattar bilim berý salasynda is júzinde jumys istemeıtin úlestes tulǵalardyń paıdasyna jalaqy túrindegi óteýsiz aýdarý jolymen asa iri mólsherde bıýdjet qarajatyn júıeli negizde urlady dep kúdiktenedi.

Aldyn ala keltirilgen zalal somasy shamamen 2 mlrd teńgeni qurady.

«Qazirgi tańda istiń mán-jaılaryna tıesili 29 jyljymaıtyn múlik obektisine, qymbat avtokólikterge tyıym salyndy.

Kúdikti adamdar ustalyp, sottyń sanktsııasymen qamaýǵa alyndy.

Sotqa deıingi tergeý jalǵasýda», - dep jazdy Antıkordan.

QPK-niń 201-babyna sáıkes tergeý múddesi úshin ózge aqparat jarııa etýge jatpaıdy.

Sonymen birge, Konstıtýtsııanyń 77-baby 3-tarmaǵynyń 1-tarmaqshasyna jáne Qylmystyq-protsestik Kodeksiniń 19-baby 1-bóligine sáıkes, qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deıin árqaısysy kinásiz dep esepteledi.

Buǵan deıin prokýratýra taldyqorǵandyq esepshilerdiń ustalǵanyn rastaǵan.