Mıllıardtaǵan qaryzy bar Oral jylý-elektr ortalyǵy gazdan ajyratyldy
AQTÓBE. KAZINFORM – Oralda jylý maýsymy bastalar tusta «Jaıyqjylýqýat» AQ-y gazdan ajyratyldy. Arada bir kún ótkende jergilikti ákimdik bıýdjetten qarjy bólý týraly sheshim shyǵardy.
Batys Qazaqstan oblysy Oral qalasynda kezekti jylý berý maýsymyna daıyndyq júrdi. «Jaıyqjylýqýat» AQ-y 13-qyrkúıekten bastap negizgi jabdyqtardy josparly túrde toqtatyp, jóndeý, profılaktıkalyq jáne dıagnostıkalyq jumystardy atqardy, sondaı-aq jabdyqtardy synaqtan ótkizdi. Qaıta iske qosý 21-qyrkúıekke josparlanǵan bolatyn.
- 16-qyrkúıekte jylýóelektr ortalyǵyndaǵy barlyq qajetti jumys aıaqtaldy. Kásiporyndy qaıta iske qosýǵa daıyndyq kezinde tabıǵı gaz jetkizýshi aldyndaǵy bereshegin óteý máselesi týyndady. Búgingi kúndegi jaǵdaı boıynsha «Jaıyqtjylýqýat» AQ-nyń «QAZAQGAZ Aimaq» AQ aldyndaǵy tabıǵı gaz boıynsha bereshegi 3,542 mlrd teńgeni quraıdy. Onyń ishinde 1 mlrd teńgeni jergilikti bıýdjet qarajaty esebinen óteý josparlanyp otyr. Qalǵan bereshek somasy boıynsha kezeń-kezeńimen óteý kestesi ázirlenedi. 17- qyrkúıek saǵat 09:00-degi jaǵdaı boıynsha Oral JEO-na tabıǵı gaz berý qaıta bastaldy. Qazirgi ýaqytta jabdyqtardy iske qosý jumystary júrgizilýde. Búgin saǵat 17:00-ge deıin tutynýshylar ystyq sýmen qamtamasyz etiledi,- dep habarlady Oral qalasy ákiminiń baspasóz qyzmeti.
BQO Energetıka jáne turǵyn úı-kommýnaldyq sharýashylyq basqarmasynyń habarlaýynsha, «Jaıyqjylýqýat» AQ-nyń «QAZAQGAZ Aimaq» AQ aldyndaǵy 1 mlrd teńge qaryzy erteńge deıin óteledi. Qarjy jergilikti bıýdjetten aýdarylady.
«QazaqGaz Aimaq» AQ-y búgin gaz berý qaıta qalpyna keltirilgenin, al qaryzdy óteý suraǵy boıynsha kelissóz júrip jatqanyn habarlady.
Aıta keteıik, elimizde jylý berý maýsymy bastaldy. Sonyń ishinde Pavlodar qalasynyń áleýmettik nysandaryna jylý berildi.
